Մայքլ Ջեքսոնի հիշատակին նվիրված համերգը տեղի կունենա 2011 թ. հոկտեմբերին Քարդիֆում: Շոուն տեղի կունենա «Միլենիում» մարզադաշտում: Այս մասին հատուկ հրավիրված մամլո ասուլիսի ժամանակ հայտնել են փոփ արքայի հարազատները: Հաղորդում է ContactMusic-ը:
Ինչպես հայտարարել են Ջեքսոնի մայրը՝ Քեթրինը, քույրը՝ Լատոյան և եղբայրները՝ Տիտոն, Ջեքին և Մարլոն, հիշատակ-համերգին մասնակցելու են մի քանի արտիստ: Դեռևս հայտնի չէ նրանց ցուցակը: Հարազատների կարծիքով՝ համերգին կմասնակցեն միայն նրանք, ում Ջեքսոնն անձամբ սիրում էր ու հարգում: Մասնակիցների ցուցակը կհրապարակվի մինչև օգոստոսի 4-ը: Այդ օրը նաև կմեկնարկի տոմսերի վաճառքը: Ակնկալվում է, որ Մայքլ Ջեքսոնի հիշատակին նվիրված համերգին մասնակցելու է 75 հազար մարդ:
Ջեքսոնի այլ հարազատների դուր չեն եկել համերգի անցկացման վայրի և ժամանակի մասին լուրերը: 2009 թ. մահացած փոփ-աստղի եղբայրները՝ Ջերմեյնը և Ռենդին, ինչպես նաև քույրը՝ Ջենեթը, հայտարարել են, որ դեմ են այս համերգի կազմակերպմանը:
Ըստ նրանց՝ իրենք ուրախ են Մայքլին նվիրված ցանկացած միջոցառման անցկացման համար, սակայն դեմ են հոկտեմբերին կայանալիք համերգին, քանի որ այդ ժամանակ սկսվելու է նրա բժիշկ Կոնրադ Մյուրեի նկատմամբ դատական պրոցեսը:
Ավելի վաղ ևս՝ նրա մահանալուց մի քանի շաբաթ հետո, ցանկություն է եղել կազմակերպել համերգ, սակայն այն հետաձգվել է: