Վիճակախաղերի, շահումով խաղերի, ինտերնետ շահումով խաղերի և խաղատների լիցենզավորող հանձնաժողովը հուլիսի 8-ի նիստի արդյունքում կայացրել է եզրակացություն, ըստ որի` «Օնիրա Քլաբ» ՍՊ ընկերությանը տրված խաղատան կազմակերպման լիցենզիան պետք է ուժը կորցրած ճանաչվի: Այս մասին տեղեկացավ պաշտոնական հայտարարությունների azdarar.am կայքից:
Եզրակացությունը կայացվել է հանձնաժողովի հուլիսի 8-ի նիստի արդյունքում: Լիցենզիան ուժը կորցրած ճանաչելու համար որպես հիմանվորում է նշվում, որ «Օնիրա Քլաբ» ՍՊԸ-ն չի վճարել ՀՀ ֆինանսների նախարարության կողմից տրված խաղատան կազմակերպման լիցենզիայի համար 2020 թվականի երրրորդ եռամսյակի պետական տուրքի տարեկան գումարի մեկ քառորդ մասը:
«Շանգրի Լա» խաղատունը շահագործողը «Օնիրա Քլաբ» ՍՊԸ-ն է:
Սակայն լիցենզիայից զրկելու համար դեռ անհրաժեշտ է Ֆինանսների նախարարի հաստատումը:
Ազգային անվտանգության ծառայության հունիսի 14-ին տարածած հաղորդագրության համաձայն՝ ԲՀԿ ղեկավար Գագիկ Ծառուկյանի «Մուլտի գրուպ» կոնցեռնի մեջ մտնող «Օնիրա Քլաբ» ընկերությունը պետությանը տասնյակ միլիարդավոր դրամների վնաս է պատճառել։ Այս մասով ԱԱԾ քննչական դեպարտամենտում քրեական գործ էր հարուցվել:
