Թուրքական Today`s Zaman թերթին տված հարցազրույցի ժամանակ Ադրբեջանի տնտեսական զարգացման նախարար Շահին Մուսթաֆաևն անդրադարձել է Ադրբեջանի ու Թուրքիայի միջև առկա էներգետիկ խնդիրներին և մասնավորապես Nabucco գազատարի նախագծին.
«Ադրբեջանը դրականորեն է վերաբերում Nabucco-ի նախագծին։ Սակայն մենք պետք է մտածենք բնական գազով Nabucco-ի ապահովման և խողովակաշարին գազ մատակարարելիք երկրների որոշակիացման հարցերի շուրջ»։
Անդրադառնալով Թուրքիայի ու Ադրբեջանի միջև ազատ ապրանքաշրջանառության խնդրին՝ Մուսթաֆաևն ընդգծել է, որ դեռևս օրակարգում չի գտնվում ազատ առևտրի մասին պայմանագրի հարցը.
«Ադրբեջանի համար առաջնային է համարվում տեղական արտադրությանն աջակցելը։ Բաքուն շատ զգուշորեն է վերաբերվելու Թուրքիայի հետ ազատ առևտրի պայմանագրի կնքմանը։ Կարծում եմ, որ դրա համար կպահանջվի որոշ ժամանակ։ Առաջին հերթին պետք է ոտքի կանգնի մեր ձեռնարկատիրությունը»։
Մուսթաֆաևի խոսքերով՝ Թուրքիան կարող է Ադրբեջանին աջակցել սեփական տնտեսության դիվերսիֆիկացման հարցում. «Ներկայումս Ադրբեջանում գործունեություն է ծավալում մոտ 1300 թուրքական ընկերություն։ Թուրքական ընկերությունները մոտ ապագայում Գաբալայում կառուցելու են միջազգային օդանավակայան։ Միևնույն ժամանակ 1000 ադրբեջանական ընկերություններ էլ գործում են Թուրքիայում»։
Հիշեցնենք, որ 2010 թվականին Թուրքիայի ու Ադրբեջանի միջև ապրանքաշրջանառությունը կազմել է 2.5 միլիարդ դոլար։ Իսկ այս տարվա առաջին հինգ ամիսներին Թուրքիայի արտահանումը դեպի Ադրբեջան կազմել է 731 միլիոն դոլար, իսկ ներկրումը՝ 667 միլիոն դոլար։
Ի դեպ, վաղն Ադրբեջան է ժամանում Թուրքիայի վարչապետ Ռեջեփ Թայյիփ Էրդողանը, որի օրակարգում են ընկած լինելու Nabucco-ին Ադրբեջանի միանալու, Ադրբեջանի կողմից Թուրքիայի հետ անցագրային ռեժիմի վերացման, ինչպես նաև ղարաբաղյան հակամարտության կարգավորմանը խնդիրները։
