ՀՀ տարածքային զարգացման և ենթակառուցվածքների նախարար Սուրեն Պապիկյանը կառավարության նիստի ընթացքում խոսեց ՀՀ ճանապարհային խնդիրների, բեռնատարների կողմից դրանց վնասելու մասին: Նախարարը փաստեց, որ ՀՀ-ում լուծված չէ ծանրաքարշ, ծանր բեռնված մեքենաների խնդիրը:
Ըստ Պապիկյանի՝ այդ մեքենաները, որոնք երբեմն 30 տոննա քաշ են ունենում, լուրջ ազդեցություն են թողնում ճանապարհների որակի վրա՝ հատկապես ամռանը, դրանք կարող են լրջորեն վնասել ճանապարհները:
Վարչապետ Նիկոլ Փաշինյանն էլ նեղսրտեց, թե իրենք միլիարդներ են ծախսում ճանապարհների որակը բարձրացնելու համար, ինչ-որ մարդիկ մի քանի հազար ավելի աշխատելու համար այդ ճանապարհների քանդման գործով են զբաղվում: «Հայաստանում 3-4 տեղում բեռնատարների կշռման կետեր պետք է ունենանք, և բոլոր բեռնատարները պետք է կշռվեն»,- հայտարարեց վարչապետը։
«Առաջին լրատվական»-ի հետ զրույցում Հայաստանի տրանսպորտային առաքողների միության նախագահ Մակար Առաքելյանը իսկապես մտահոգիչ համարեց այս խնդիրը, որ բարձրաձայնում են կառավարության անդամները։ Ոլորտի մասնագետը շեշտեց, որ Հայաստանի ճանապարհների վնասման գործում մեղավոր են միայն տեղական բեռնափոխադրում իրականացնողները, քանի որ միջազգային բեռնափոխադրում իրականացնող ընկերությունները աշխատում են միջազգային ընդունված ստանդարտներով ու մեկ գրամ անգամ ավելի բեռ չեն արտահանում։
Մակար Առաքելյանը միանշանակ պնդում է, որ պետք է կշեռքներ տեղադրվեն Հայաստանի գոնե այն ճանապարհահատվածներին, որոնցով հիմնականում բեռնափոխադրումներ են իրականացվում։ «Դա միանշանակ է։ Դա անգամ պարտադիր է։ Բոլոր երկրներում դա կա։ Այստեղ հարցն այն է, որ Հայաստանում ավելի շատ խնդիրը ոչ թե միջազգային բեռնափոխադրող ընկերությունների հետ է, այլ տեղական։ Միջազգային ընկերություններն իրենց բեռնափոխադրումը կատարում են միջազգային ստանդարտներին համապատասխան։ Մաքսատանը բեռը կշռվում է ու ստանդարտից ավելի բեռ չի կարող արտահանվել։ Տուգանքների չափն այնքան մեծ է, որ ոչ ոք չի կարող դրա տակից դուրս գալ։ Նույնը նաև ներմուծման դեպքում է։ Նախկիններում եղել են թերություններ, բայց հիմա չկա։ Ե՛վ Ռուսաստանը, և՛ Վրաստանը, պարտադիր ստիպում են բեռը կշռել։ Ռուսաստանի տարածքում կան տեղադրված կշեռքներ, ոստիկանը իրավունք ունի ցանկացած մեքենա կշռել։ Այստեղ խնդիրը ներքին փոխադրումների մեջ է»,- մանրամասնեց մեր զրուցակիցը։
Առաքելյանը խորհուրդ տվեց ուշադրությունը կենտրոնացնել ներքին բեռնափոխադրումների վրա, քանի որ չկա ոչ մի կառույց, որը կհետևի բեռնատարների քաշին։ «Այդ բեռնատարներին ոչ ոք չի ստուգում, ու հիմնական խնդիրն այդտեղ է։ Հայաստանի ներսի ճանապարհները փչացնում են ոչ թե դրսի բեռնատարները, այլ ներսի։ Երևանից Կապան, Երևանից Հոկտեմբերյան և այլն։ Օրինակ՝ ավազ են բարձում, շինանյութ են բարձում, ոչ ոք չի ստուգում։ Մեքենա կա, որ կարող է 30 տոննա բեռ տանել, բայց դա երբեք թույլատրված չէ։ Մեր ճանապարհների համար չէ դա։ Բեռի քաշը կախված է մեքենայի տեսակից ու սռնիների քանակից։ 30 տոննա բեռ տանելու համար 6 սռնանի մեքենա է պետք, իսկ Հայաստանում այդպիսի մեքենա, եթե ման գանք, մի քանի հատ կգտնենք, թե ոչ, դա էլ հարց է։ Խնդիրը շատ մտահոգիչ է»,- ասաց Մակար Առաքելյանը։
Հայաստանի տրանսպորտային առաքողների միության նախագահը խնդրի լուծումը տեսնում է հիմնական ճանապարհներին կշեռքների տեղադրումով, հակառակ դեպքում ՀՀ ճանապարհները կշարունակվեն վնասվել։
Հայաստանի Միջազգային փոխադրողների ասոցիացիա հասարակական կազմակերպություն նախագահ Հերբերտ Համբարձումյանը, խոսելով վարչապետի մտահոգության մասին, ևս նշեց, որ իրենց դեպքում բեռի քանակի որևէ խախտում չի կարող լինել, քանի որ բեռը Հայաստանից դուրս գալուց կշռվում է մինչև տվյալ երկիր հասնելը։
«Մենք եթե ուզենք էլ, խախտում չենք կարող անել, քանի որ Ռուսաստանում կշռվում է ու մեկ գրամ անգամ ավելի դեպքում տուգանք է սահմանվում»,- ասաց Համբարձումյանը։ Նա ևս շեշտեց այն հանգամանքը, որ տարիներ շարունակ ներքին բեռնափոխադրումներ իրականացնող մեքենաները ստուգման չեն ենթարկվել, քաշը չի կշռվել։ «Իհարկե, եթե մեկ կամ երկու սռնի ունեցող բեռնատարի վրա, եթե 30-40 տոննա բեռ բարձես, ճանապարհների հերը կանիծի։ Ճանապարհների փչացնելը կածված է սռնիների քանակից ու բեռնվածքից։ Այդ հարցով միջազգային փոխադրողների մոտ բացառվում է խախտում անելը»,- նշեց Հերբերտ Համբարձումյանը։