Ինչպես գրում է The Guardian-ը, մադրիդցի մի խումբ գիտնականներ սկսել են փնտրել իսպանացի հայտնի գրող Միգել դե Սերվանտեսի գերեզմանը: «Դոն Կիխոտի» հեղինակը մահացել է 1616 թ. և, համաձայն իր վերջին կամքի, թաղվել է Ատոչա փողոցի վրա գտնվող մենաստանում՝ իր տան հարևանությամբ: Սակայն գերեզմանը կորել է, քանի որ այդ վայրում վերակառուցում է կատարվել:
Բացի այդ, հայտնի չէ, թե ինչ տեսք է ունեցել Սերվանտեսը: Միակ նկարն արվել է Խուան դե Խուարեգիի կողմից Սերվանտեսի մահվանից 20 տարի անց: Պատմաբան Ֆերնանդո Պրոդոն ասում է, որ մեծ գրողի աճյունի հայտնաբերումը թույլ կտա պատասխանել շատ հարցերի: «Մենք կարող ենք ոչ միայն հասկանալ, թե ինչ տեսք է նա ունեցել, այլև պարզել, թե ինչից է նա մահացել: Հայտնի է, որ կյանքի վերջում նա շատ հիվանդ է եղել, սակայն դա նաև եղել է նրա ստեղծագործական գործունեության ամենաբեղմնավոր շրջանը»,- ասել է Պրադոն:
Սերվանտեսի աճյունը հայտնաբերելուն կօգնի այն փաստը, որ թուրքերի հետ ծովային ճակատամարտի ժամանակ նա կորցրել է ձեռքը:
