Բավական մեծ թվով քաղաքացիներ զրկվել են գործազրկության նպաստներից՝ «Զբաղվածության պետական ծառայություն» գործակալության իրականացրած տվյալների համադրումների արդյունքում: Ինչպես այսօր լրագրողների հետ հանդիպման ժամանակ հայտնեց ՀՀ աշխատանքի և սոցիալական հարցերի նախարար Արթուր Գրիգորյանը, քաղաքացիները ներկայացրել էին կեղծ տվյալներ: Արդյունքում խնայվել է 700 մլն դրամ:
«Հունվար-մայիս ամիսներին հանրապետությունում գրանցված տնտեսական աճի արդյունքում ստեղծվել են նոր աշխատատեղեր»,- հավաստեց նախարարը՝ նշելով, որ զբաղվածության պետական ծառայությունը հուլիսի 1-ի դրությամբ հայտնաբերել է 1814 թափուր աշխատատեղ, որը նախորդ տարվա նույն ժամանակահատվածի համեմատ աճել է 12.7%-ով, իսկ աշխատանքի տեղավորվածների թիվը 18.8%-ով գերազանցել է նախատեսված ցուցանիշը և կազմել 5641 մարդ:
Ա. Գրիգորյանի խոսքով, հունիսի 1-ի դրությամբ, հանրապետությունում գրանցված գործազրկության մակարդակը նվազել է 0.4%-ով և կազմել 6.6%:
Անդրադառնալով մանկատների բեռնաթափման խնդրին՝ Ա.Գրիգորյանը նշեց, որ կիսամյակի տվյալներով 15 երեխաների մուտքը մանկատուն արգելվել է. «Պետք է թույլ չտանք, որ երեխան անտեղի հայտնվի մանկատանը, կամ այն երեխան, որն իրականում պետք է լինի մանկատանը, չհայտնվի փողոցում»: Արդյունքում Երևանում «Զատիկ» մանկատան երեխաների թիվը 70 երեխայից նվազել է մինչև 40-ի, և ևս 10 երեխա ենթակա է այլ հաստատություն կամ ընտանիք տեղափոխվելու:
Նախարարը նաև տեղեկացրեց, որ գազի զեղչված գներից օգտվելու է 60 հազ. ընտանիք:
