Այսօր՝ ժամը 13:00-ին, ԱԺ արտահերթ նիստ է հրավիրված, որի ժամանակ երկրի մայր օրենքը պետք է փոփոխության ենթարկվի, խորհրդարանական ճեպազրույցների ժամանակ ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ հավելելով, որ այդ մասին իմացել են միայն այսօր առավոտյան՝ խորհրդի նիստի ժամանակ:
«Որքանով հասկացա՝ 3-ժամյա ռեժիմ է սահմանված: Ամբողջ աշխարհում, գիտեք, որ երբ մայր օրենք՝ Սահմանադրություն է փոխվում, դա ամիսների աշխատանք է, հանրային լսումներ, քննարկումներ, դեբատներ, քարոզարշավ, բանավեճեր: Հայաստանում դա արվում է այդ ձևով, այսինքն՝ գալիս ես խորհրդարան, 9:30 իմանում, որ Սահմանադրությունը պետք է փոխվի, գնում ես այդ նիստին, ու փոխվում է Սահմանադրությունը», – նշեց պատգամավորը: