Լիբանանահայ «Ազդակ» օրաթերթը հայտնում է, որ Թուրքիայի վարչապետ Ռեջեփ Թայիփ Էրդողանն այսօր պաշտոնական այցով ժամանել է Բեյրութ: Թերթի փոխանցմամբ, հարյուրավոր հայ երիտասարդներ բողոքի ցույց են կազմակերպել` պաստառներով և պահանջատիրական կարգախոսներ հնչեցնելով:
«Ազդակը», կապ հաստատելով հայ պատգամավոր Հակոբ Բագրատունու հետ, տեղեկացել է, որ երեկ ուշ գիշերին ներքին անվտանգության ուժերի հրամանատար Աշրաֆ Ռիֆիի հրամանով Էրդողանի դեմ Բուրջ Համուդից Անթիլիաս ձգվող ճանապարհի վրա տեղադրված բոլոր պաստառները ներքին անվտանգության ուժերի կողմից հանվել են: Հայերը բողոքել են այս քայլի դեմ` հայտնելով, որ այդ վարվելակերպը բնորոշ է բռնատիրական երկրներին, որտեղ արգելված է ազատ խոսքը:
Բագրատունին պահանջել է, որ այս քայլի հեղինակները պատասխանատվության կանչվեն:
Բողոքի մեծ ակցիա է եղել նաև հենց այն օդանավակայանի մոտ, որտեղ ժամանել է Էրդողանը:
