Սամցխե-Ջավախեթիի Ախալքալաքի շրջանի Գոմանի գյուղում ահայտ անձինք ծանր տեխնիկայով վնասել են հայկական տաճարն ու տաճարի բակում գտնվող գերեզմանները, ասվում է Վրաստանի մշակութային ժառանգության պաշտպանության ազգային գործակալության հաղորդագրության մեջ:
Բազմաթիվ վնասվածքներ են հայտնաբերվել գործակալության վերահսկողության ծառայության տեսչական խմբի աշխատակիցների կողմից:
Սուրբ Գրիգոր Լուսավորիչ տաճարի բակում ծանր տեխնիկայի հետքեր են երևում կառույցի երեք ճակատային մասերի՝ արևմտյան, հարավային և արևելյան կողմերից: Վնասվել են գերեզմանները. ամենուրեք մարդկային մնացորդներ են: Վնասված են նաև ցանկապատն ու մուտքը:
Այս պահին գործակալության աշխատակիցները պարզում են մշակութային ժառանգության հուշարձանին հասցված վնասի աստիճանը, իսկ ոստիկանությունը փնտրում է մեղավորներին:
Գործակալության հաղորդագրության հիման վրա ՆԳՆ Սամցխե-Ջավախեթիի ոստիկանության բաժինը քրեական գործ է հարուցել մշակութային ժառանգության հուշարձանին վնաս պատճառելու փաստով: