«Առաջին լրատվական»-ի զրուցակիցն է լրագրող Վահագն Ղուկասյանը, որը մեկ տարի առաջ է վերադարձել Հայաստան։ Նա Հոկտեմբերի 27-ի հետ կապված կարևոր բացահայտումների հեղինակ է:
– Պարոն Ղուկասյան, Հոկտեմբերի 27-ի գործը վերաբացվել է։ Ըստ Ձեզ՝ որտեղի՞ց պետք է սկսել գործը, որպեսզի հաջող ընթացք ունենա նախաքննությունը։
– Հոկտեմբերի 27-ի գործը բավականին ծավալուն, 5 տասնյակից ավելի հաստափոր հատորներ են, (խոսքս իրական հատորների մասին է, ոչ թե այդ գործով նախկին մեղադրյալ՝ Ալիկ Հարությունյանի և այժմ Ռոբերտ Քոչարյանի փաստաբան Ռուբեն Սահակյանի կողմից տարածված՝ քրեական գործի համակարգչային տարբերակի։ Ես ի սկզբանե Ռուբեն Սահակյանի տարածած տարբերակին չեմ վստահել, և ես, որպես այդ հատորները ուսումնասիրած անձ, եկել եմ այն համոզման, որ Հոկտեմբերի 27-ի գործի բացահայտման համար այդ հատորներում բազմաթիվ, այսպես կոչված, «թելի ծայրեր» կան, որոնցով կարելի է ամբողջ կծիկը քանդել։
– Կարո՞ղ եք կոնկրետ օրինակ նշել։
– Իհարկե, կարող եմ՝ հաշվի առնելով, որ ես նախաքննության անդամ չեմ, ինչպես նաև որևէ փաստաթուղթ չեմ ստորագրել, իմ կողմից ինքնակամ ուսումնասիրված նյութերը չհրապարակելու որևէ պարտականություն չեմ ստանձնել։ Բայց բոլոր դեպքերում այդ պարտականությունը ես ինքս եմ իմ առջև դրել, որովհետև ես շատ եմ կարևորում «նախաքննության գաղտնիքի» սկզբունքը, և կարծում եմ, որ կան բաներ, որոնց ժամանակից շուտ հրապարակայնեցումը կվնասի նախաքննության ընթացքին։
Ինչ վերաբերում է Հոկտեմբերի 27-ի անջատված մասով ընթացող նախաքննության հաջող ընթացք ունենալուն, ապա, կարծում եմ, լավ կլիներ, եթե Ազգային ժողովում համապատասխան քննիչ հանձնաժողով ստեղծվեր։ Հիշեցնեմ, որ 2001-ին ԱԺ-ում Հոկտեմբերի 27-ի գործով նախաքննության ընթացքում կատարված ապօրինությունների ուսումնասիրման խորհրդարանական ժամանակավոր հանձնաժողով ստեղծվեց, բայց այն ժամանակ հասարակությունը այդ հանձնաժողովին միանգամայն արդարացիորեն չեր վստահում։ Հիմա այլ իրավիճակում ենք, ՀՀ Ազգային ժողովը ժողովրդի կողմից մեծ վստահություն ունի, և մեծամասնություն կազմող «Իմ քայլը» դաշինքի պատգամավորներն էլ կաշկանդված չեն և ոչ մի կախվածություն չունեն նախկիններից։ Հետևաբար, եթե Ազգային ժողովում հիմա քննիչ հանձնաժողով ստեղծվի, ապա, կարծում եմ՝ այն կարող է արդյունավետ աշխատել ու շատ օգտակար լինել գործը քննող ԱԱԾ քննչական խմբին։
Ավելին, մենք գիտենք, որ որքան էլ հեղափոխություն է տեղի ունեցել, մարդիկ կան, որոնք չեն վստահում ԱԱԾ-ին, և եթե, ի վերջո, ԱԺ-ում համապատասխան հանձնաժողով ստեղծվի, կգան և շատ բան կասեն։
– Գլխավոր դատախազ Արթուր Դավթյանը չի բացառում, որ Հոկտեմբերի 27-ի գործով հարցաքննվի նաև այն ժամանակ զինդատախազ Գագիկ Ջհանգիրյանը։
– Նորմալ եմ գնահատում այս հայտարարությունը, բնականաբար պետք է հարցաքննվի։ Անձամբ գտնում եմ, որ Ջհանգիրյանի՝ զինդատախազ եղած ժամանակ գործը քննվել է, բայց լիակատար չի քննվել։ Բացի դրանից՝ Ռոբերտ Քոչարյանը չնայած նախագահ էր, բայց նա գործով ամենագլխավոր վկաներից մեկն էր, որովհետև ահաբեկիչները զենքը վայր դրեցին այն ժամանակ, երբ Քոչարյանի հետ հանդիպեցին։
