Վրացի լրագրողները և լուսանկարիչները մի շարք ցույցեր են կազմակերպել Թբիլիսիում և Վրաստանի այլ քաղաքներում՝ բողոքելով Ռուսաստանի օգտին լրտեսության մեղադրանքով իրենց երեք գործընկերների ձերբակալության դեմ:
Նախագահ Միխեիլ Սահակաշվիլու անձնական լուսանկարիչ Իրակլի Գեդենիձեն, «Alia» թերթի ֆոտոթղթակից և Associated Press-ի արտահաստիքային լուսանկարիչ Գեորգի Աբդալաձեն և EPA ֆոտոգործակալության ֆոտոթղթակից Զուրաբ Կուրցիկիձեն ձերբակալվել են հուլիսի 7-ին:
Նրանց լրտեսության՝ ռուսական հատուկ ծառայություններին պետական գաղտնիք պարունակող տեղեկություններ փոխանցելու մեղադրանք է ներկայացվել: Ֆոտոլրագրողների դեմ հարուցված գործը գաղտնիացված է:
Գեդենիձեի կինը՝ Նաթիան, նույնպես ձերբակալվել էր, սակայն հետագայում նրան ազատ էին արձակել:
Հուլիսի 11-ին Թբիլիսիում ներքին գործերի նախարարության շենքի առջև հավաքված ցուցարարները պահանջում էին հանդիպում կազմակերպել Վրաստանի ներքին գործերի նախարար Իվանե Մերաբիշվիլու հետ, գաղտնազերծել երեք ֆոտոլրագրողների դեմ հարուցված գործը, ինչպես նաև մանրամասն տեղեկություններ հրապարակել [գործի] մասին:
Լրագրողները և իրավապաշտպան ակտիվիստները կարծում են, որ երեք ֆոտոլրագրողների ձերբակալության պատճառը նրանց՝ անցյալում կատարված լուսանկարներն են: Աբդալաձեի խոսքերով՝ իրեն և նրա գործընկեր Գեդենիձեին պատժում են մայիսի 26-ին ոստիկանության կողմից ընդդիմության բողոքի ցույցը ցրելու ուժային գործողությունները պատկերող լուսանկարների համար:
Գեորգի Կուպատաձեն «Կովկասյան լրատու» պարբերականի խմբագիրն է Թբիլիսիում:
