«Մտավարի» ընդդիմադիր հեռուստաընկերության տեղեկատվության համաձայն, մոտ ապագայում Վրաստանի վարչապետ Գեորգի Գախարիան հրաժարական կտա: Մինչդեռ, կառավարության վարչակազմում այս տեղեկատվությունը չեն հաստատում:
«Մտավարի»-ի տվյալներով, Գախարիայի հրաժարականը պահանջել է իշխող «Վրացական երազանք» կուսակցության նախագահ Բիձինա Իվանիշվիլին: Դա տեղի է ունեցել հունիսի 1-ին կայացած հանդիպման ժամանակ:
Միևնույն ժամանակ, Գախարիան չի պատրաստվում հրաժարական տալ, նշում է հեռուստաընկերությունը: «Ըստ մեր աղբյուրի, վերջնական որոշում է կայացվել, որ «Գավրիլովյան գիշերվա» դեպքերից մեկ տարի անց՝ հունիսի 20-ին, Գեորգի Գախարիան վարչապետ չի լինի»,- նշում է «Մտավարի» հեռուստաընկերությունը:
Մինչդեռ, կառավարության վարչակազմում նշել են, որ վարչապետն աշխատում է սովորական ռեժիմով: «Վարչապետն աշխատավայրում է և աշխատանքային հանդիպումներ է անցկացնում, ինչպես և այլ օրերին»,- հաղորդել են վարչակազմից և «կեղծ» են անվանել Գախարիայի հրաժարականի մասին լուրերը:
