Ամռանը գնանկում միշտ էլ լինում է և սեզոնային բնույթ է կրում, ինչը կապված է բացառապես գյուղմթերքների գների հետ: «Առաջին լրատվականի» հետ զրույցում տնտեսագետ Սամվել Ավագյանը նշեց, որ հունիսից մինչև սեպտեմբեր Հայաստանում մրգի և բանջարեղենի հավաքման ամենաեռուն շրջանն է, երբ պահանջարկի ու առաջարկի դիսբալանս է առաջանում, և շուկայում գներն ընկնում են:
«Տնտեսագիտորեն սա բացասական երևույթ է, քանի որ գյուղացիները ստիպված են լինում ջրի գնով վաճառել բերքը, և դա չի լուծում նրանց սոցիալական խնդիրները, ուժեղ կերպով հարվածում է գյուղացիության շահերին: Բայց մյուս կողմից՝ դրական է այն առումով, որ շուկայում ի հայտ է գալիս գնանկում: Դա ընդհանուր առմամբ ազդում է գների մակարդակի վրա մակրոտնտեսական մակարդակով»,- ասաց Ս. Ավագյանը՝ նշելով, որ ամեն սեզոնին վիճակագրական ծառայությունը, եթե բերքը լավ է լինում, գրանցում է մոտավորապես 3-4% գնանկում:
Ս. Ավագյանը շեշտեց, թե դա չի նշանակում, որ մյուս ապրանքների գները նույնպես իջնելու են: Հակառակը՝ կարող է մյուս ապրանքատեսակների գծով գնաճ տեղի ունենալ և չեզոքացնել գյուղմթերքների գնանկումը:
