Մոսկվայում ապրող հայազգի գործարար Արարատ Տեր-Անտոնյանը դարձել է խարդախության զոհ: Վերջինս նախորդ տարի ցանկացել է ներդրումային ծրագիր իրականացնել Արմավիրի մարզի Էջմիածին քաղաքում՝ հիմնել գյուղատնտեսական նշանակության արտադրություն, սակայն կանգնել է միանգամայն այլ փաստի առաջ:
«Արարատ Տեր-Անտոնյանը փորձել է հետևել վարչապետ Փաշինյանի կոչին և Հայաստանում ներդրումներ անել, իր հայրենիքում բիզնես դնել. դրա շուրջ խոսել է իր ընկերների հետ և նրանք առաջարկել են Էջմիածնում ստեղծել անասնակերի արտադրության արտադրամաս: Նախագծել են ամբողջ բիզնես պլանը, հաշվարկել են, թե ինչքան ներդրումներ Արարատ Տեր-Անտոնյանը պետք է կատարի, ինչ տարածքում պետք է արտադրամասը դնեն, գրանցել են ՍՊԸ՝ «Գրին Ֆիդ պրոդաքշն Արարատ» անունով և պայմանավորվածության համաձայն՝ բաժնետոմսերը բաժանել են միմյանց միջև: Ամենակարևոր հարցերից մեկը, որը նրանք քննարկել են՝ վերաբերել է կոնկրետ տարածքին, թե որտեղ այդ արտադրամասը հիմնեն և այդ ժամանակ իմ պաշտպանյալի ընկերներից մեկը՝ Հակոբ Գոզուբույակյանը ասել է, որ ինքն ունի ծանոթ՝ Էդուարդ Բաբայան անունով, ով ունի համապատասխան տարածք և կարող է այն վարձակալական հիմունքներով տրամադրել, որից հետո Էդուարդ Բաբայանի հետ կնքվել է պայմանագիր: Այս ամենն անելուց հետո Արարատ Տեր-Անտոնյանը սկսել է գումարներ փոխանցել Ռուսաստանից՝ ընդհանուր առմամբ 36 հազար ԱՄՆ դոլարի չափով, որ այս նախագիծն իրականացնեն, ընդ որում՝ իմ պաշտպանյալն այդ գումարը վերցրել է բանկից՝ որպես վարկ, և առ այսօր վճարում է այդ վարկը՝ անկախ այն հանգամանքից, որ իրավիճակն այլ կերպ է դասավորվել և բիզնես գործունեություն ծավալելու փոխարեն նա դարձել է խարդախության զոհ, ընկերները խաբել են նրան»,-«Առաջին լրատվական»-ի հետ զրույցում տեղեկացրեց Արարատ Տեր- Անտոնյանի փաստաբան Վարդան Զուռնաչյանը՝ միևնույն ժամանակ հայտնելով նաև այլ ուշագրավ մանրամասներ:
Վերջինս նշեց նաև, որ առաջիկայում իրենք դատարան բողոք են ներկայացնելու՝ ՀՀ գլխավոր դատախազ Արթուր Դավթյանի դեմ՝ վիճարկելով վերջինիս անգործությունը: Փաստաբանի խոսքով՝ դատախազությունն իր լիազորությունների տիրույթում գտնվող որևէ քայլ չի ձեռնարկում՝ անգամ ներկայացված դիմումները պատշաճ ձևով քննելու ուղղությամբ:
Մանրամասները՝ տեսանյութում:
