Այսօր՝ հունիսի 1-ին, Ազգային ժողովում շարունակվում է նախորդ շաբաթ օրը սկսված հերթական նիստը: Այժմ քննարկվում է Դատախազության 2019 թվականի հաղորդումը:
Ինչպես հայտարարեց հիմնական զեկուցող Գլխավոր դատախազ Արթուր Դավթյանը` 2019-ին արձանագրվել է հանցագործության 26.850 դեպք. «Նախորդ տարվա համեմատ դեպքերն աճել են 8.8 տոկոսով»:
Նրա խոսքով` պատճառներից են իրավապահ մարմինների հետ քաղաքացիների համագործակցության մակարդակի աճը, բարեփոխվել է հանցագործների հաշվառման գործընթացը. «Ոստիկանությունը նվազեցրել է դեպքերը թաքցնելու արատավոր պրակտիկան»:
Գլխավոր դատախազը մտահոգիչ համարեց գողությունների, ճանապարհային երթևեկության կանոնների խախտման դեպքերի աճը:
«Ծեծի և այլ բռնի գործողությունների դեպքերը նվազել են 23.6 տոկոսով, իսկ սպառնալիքների դեպքերը` 14 տոկոսով: 34 տոկոսով աճ է արձանագրվել, սակայն, հանրային ամենամեծ հանցատեսակով` սպանությունով: 2018-ին արձանագրվել էր սպանության դեպքերի աննախադեպ ցածր ցուցանիշ` ընդամենը 35 դեպք: Այնուամենայնիվ, 2019-ին արձանագրվել է սպանության ավելի քիչ դեպք, քան դրան նախորդող 2017-ին, 2016-ին և դրան նախորդող ժամանակշրջանում»,- հայտարարեց գլխավոր դատախազը:
Մանրամասները՝ տեսանյութում: