Արտագաղթի պատճառների ու մարդու հոգեբանության վրա հետևանքների ազդեցության մասին «Առաջին լրատվականը» զրուցեց ԵՊՀ կիրառական հոգեբանության աշխատակից Իզաբելլա Ղազարյանի հետ, ով մարդուն արտագաղթի դրդող պատճառների թվում նշեց անձի անպաշտպանվածության խնդիրը, ազգային բնավորությունը։
«Անպաշտպանվածության զգացողությունը շատ ավելի լայն մակարդակի հարց է»,- ասաց հոգեբանը՝ նշելով, որ հաճախ Հայաստանից հեռանում են ֆինանսապես բարեկեցիկ ընտանիքները, երկիրը լքում են միջին խավի մարդիկ։ «Ներքին ապահովություն չկա։ Անապահով մարդիկ չեն հեռանում, քանի որ նրանց միտքն զբաղված է սննդի հայթայթմամբ»,- ասաց Ի.Ղազարյանը։
Սոցիալական ու ֆինանսական պատճառները՝ գումարած անապահովության զգացումը, ըստ հոգեբանի, հանգեցնում են նրան, որ մարդը չի ցանկանում ապրել այս երկրում։
Ըստ նրա՝ երկրորդ ու կարևոր պատճառներից մեկն էլ այն է, որ դարերով պետականություն չունենալու հանգամանքը, սահմաններ չունենալու զգացողությունը նպաստում են մարդկանց՝ երկիրը լքելու ցանկության առաջացմանը։
Նրա խոսքով, արտագաղթը կարող է սոսկալի հետևանքների հանգեցնել, քանի որ Հայաստանից հեռանում են մասնագիտական ներուժ ունեցող մարդիկ. «Դա նշանակում է, որ երկիրը չի զարգանա, երեխաներ չեն ծնվի։ Հետևանքները կլինեն սոցիալ-դեմոգրաֆիական»։
