Դրական գնահատելով երկխոսության առաջին փուլը՝ այսօր հրավիրված ասուլիսի ընթացքում երկխոսության իշխանական պատվիրակության կազմում ներկայացված ԱԺ ՕԵԿ-ական պատգամավոր Խաչիկ Հարությունյանը նշեց, որ երկրորդ հանդիպումը տեղի կունենա երեքշաբթի օրը կառավարության ընդունելության սրահում: Նա նշեց, որ թե՛ ՀԱԿ-ը, թե՛ կոալիցիան մեծ ակնկալիքներ չունեին, որ երկխոսությունը կկայանա, բայց ամեն դեպքում այն տեղի ունեցավ:
Նրա խոսքերով, ժամանակն է, որ իշխանությունն ու ընդդիմությունը ոչ թե դիմեն ծայրահեղ քայլերի, այլ մեկ սեղանի շուրջ քննարկեն առաջ եկած խնդիրները: Իսկ եթե կարողանանք հասնել տրամաբանական ավարտին, երկրի համար շատ կարևոր արդյունքներ կարձանագրենք:
Լրագրողներից մեկի այն հարցին, որ ՀԱԿ-ը տարիներ առաջ մի շարք որակումներ տվեց ՕԵԿ-ին՝ ընդհուպ առաջնորդին անվանելով ԱԽՔ, նրանք պատրա՞ստ են հանուն երկխոսության մի կողմ դնել այդ որակումները՝ Հարությունյանը պատասխանեց, որ Լևոն Տեր-Պետրոսյանն ասում է այն, ինչ 2008 թվականին ասում էր Արթուր Բաղդասարյանը՝ հիմք ընդունելով երկրի առաջ ծառացած արտաքին խնդիրները, ավելին՝ Խաչիկ Հարությունյանը ավելացրեց, որ եթե այն ժամանակ Լևոն Տեր-Պետրոսյանը որդեգրեր այս մարտավարությունը Մարտի 1 տեղի չէր ունենա: «Եթե սկսենք մանր-մունր հարցերին ուշադրություն դարձնել, ճիշտ ճանապարհից կշեղվենք, մենք ավելի վեհանձն ենք»,- ավելացրեց Խաչիկ Հարությունյանը:
Ինչ վերաբերում է այն դիտարկմանը, թե Սերժ Սարգսյանը վերջին պահին փոխում է իր մտադրությունը և վատ դրության մեջ դնում թե՛ իր կուսակիցներին, թե՛ կոալիցիոն ներկայացուցիչներին, հետևաբար մտավախություն չկա՞, որ նա կհամաձայնի արտահերթ ընտրությունների անցկացման որոշումը վերանայել և ՕԵԿ-ին փոխարինել ՀԱԿ-ով՝ Հարությունյանը արձագանքեց, որ դժվար է ասել, թե ով ում հաշվին կմտնի խորհրդարան, քանի որ յուրաքանչյուրը իր տեղն ունի՝ ընդգծելով, որ ՀԱԿ-ը իր ընտրազանգվածով հետևաբար կմտնի խորհրդարան, բայց ոչ ՕԵԿ հաշվին, իսկ այն կարծիքի վերաբերյալ, որ ՕԵԿ-ը չի կարող հաղթահարել 5 տոկոսի շեմը, նշեց, որ 60 հազար ձայնը այսօրվա դրությամբ իրենց համար խնդիր չէ, և իրենք կարող են ապահովել ավելին, քանի որ իրենց կառույցներն ավելի հզոր են: Ինչ վերաբերում է արտահերթ ընտրություններին՝ նշեց, որ անակնկալի չեն սպասում, քանի որ հիմքեր չկան, իսկ եթե երկխոսությունը շարունակվի՝ մեծ հաջողություն կարձանագրենք, եթե ոչ՝ յուրաքանչյուրը կգնա իր ճանապարհով: