Հանրային սննդի ոլորտի ընկերությունները փլուզման եզրին են։ Տնտեսական իրավիճակի չկայունանալու դեպքում, ոլորտի 20-30 տոկոս ընկերությունները կփակվեն։ Ընկերությունների շրջանառությունն ամբողջությամբ չի վերականգնվել, աշխատակիցները ամբողջությամբ չեն վերադարձել աշխատանքի։ Ռեստորանների, հանրային սննդի կետերի նախկին շրջանառության 25-30 տոկոսն է վերականգնվել։
Այդ մասին «Առաջին լրատվական»-ի հետ զրույցում ասաց հասարակական սննդի ոլորտի փորձագետ, ռեստորատոր Աշոտ Բարսեղյանը։
Ոլորտի մասնագետի խոսքերով՝ ստացված եկամուտը ոչ միայն շահույթ չի ապահովում, այլև կատարված ծախսերը չի փակում։ «Մենք ունենք ոչ ամբողջ թափով աշխատող ոլորտ։ Ոլորտի ոչ բոլոր աշխատողներն են ապահովված աշխատանքով։ Ոլորտի ընկերություններն արդեն սկսում են անհանգստանալ վարձավճարների պահով»,- ասաց մեր զրուցակիցը՝ ավելացնելով՝ պետությունն իրենց թողել է բանկերի հետ միայնակ դեմ հանդիման։
Օրեր առաջ հանրային սննդի օբյեկտները հայտարարություն էին տարածել այն մասին, որ առաջարկում են ռեստորանների տարածքների սեփականատերերին նվազեցնել վարձավճարները։ Մեր զրուցակիցը հայտնեց, որ արդեն իսկ կան բազում ընկերություններ, որոնք հանձնել են տարածքները, իսկ վարձավճարների նվազման մասին խոսք չկա։ «Վստահ եմ՝ 2-3 ամսից ունենալու ենք վարձավճարների նվազում։ Իմ գնահատմամբ՝ փակվելու է ոլորտում գործող ռեստորանների 20-30 տոկոսը։ Անցած տարվա ու այս տարվա սկզբի ընթացքը լավ էր, նոր ծրագրերը շատ էին, բայց այս իրավիճակը խարխլեց ամբողջ պլանները։ Մարդիկ այս պահին մտածում են ուղղակի գոյատևման մասին։ Ոչ բոլորն են անցել այդ էտապը։ Դեռևս կան բիզնեսներ, որոնք, ցավոք սրտի, կսնանկանան։ Այս պարագայում էլ ավելի է կարևորվում հստակությունը»,- մտահոգություն հայտնեց հասարակական սննդի ոլորտի մասնագետը։
Աշոտ Բարսեղյանի խոսքերով՝ արտակարգ դրության ամբողջ ընթացքում, երբ ոլորտի ընկերությունները չեն աշխատել, պարտք են մնացել տարածքի սեփականատերերին։ «Սա շատ մեծ գումար է կազմում։ Աշխատավարձերի մասով մենք ունենք հարկադիր պարապուրդ հասկացություն, եթե ֆորս մաժորային իրավիճակ չէ։ Հարկադիր պարապուրդը ստիպում է աշխատավարձի 2/3 վճարել աշխատողներին։ Այստեղ ևս մենք ունենք կարիք՝ ունենալու գրադացիա, որպեսզի կարողանանք այլ կերպ՝ ավելի փոքր գումարով հատուցել աշխատողների մինիմալ կարիքները։ Ես չեմ խոսում ընդհանրապես չվճարելու մասին, բայց 2-3-ն ու մինիմալ կարիքներն իրարից տարբերվում են»,- մանրամասնեց Աշոտ Բարսեղյանը՝ հավելելով, որ այսօր շատ վատ ազդակներ են ստանում ընկերություններից։
Մասնագետի համոզմամբ՝ իրավիճակից դուրս չենք գա այնքան ժամանակ, քանի դեռ կառավարությունը հստակություն չի մտցրել իր գործողություններում, քանի դեռ չունենք կոնկրետ ու հստակ ժամկետներ տնտեսության ամբողջական վերականգնման վերաբերյալ։
Մանրամասները՝ «Առաջին լրատվական»-ի տեսանյութում։
