Հայաստանի ագրարագյուղացիական միավորման նախագահ Հրաչ Բերբերյանը կորոնավիրուսի համավարակով պայմանավորված ստեղծված իրավիճակում կառավարության կողմից իրականացվող գյուղատնտեսական հակաճգնաժամային ծրագրերի իրականացումը համարում է անարդյունավետ՝ շեշտելով, որ այդ ծրագրերի շահառուներից և ոչ մեկ առ այսօր լիարժեք չի կարողացել օգտվել դրանցից:
«Կառավարությունում գյուղատնտեսության ոլորտի համար չորս պատասխանատու անձ կա՝ մեկը մյուսից անգրագետ, ոչ մի նորմալ բան չեն կարողանում անել գյուղացիների հոգսը թեթևացնելու համար: Բազմիցս հայտարարել ենք, որ սուբսիդավորումը բանկերի համար չի, այլ՝ գյուղմթերք արտադրողներինը, մինչդեռ մի քանի օր առաջ էլ այցելել էի Շիրակի մարզ ու այնտեղ երեք բանկեր, որոնք պարտավոր են կառավարության այդ ծրագրի շրջանակներում անտոկոս վարկեր տրամադրել գյուղացիներին՝ վերջիններիս համար արհեստական խոչընդոտներ են ստեղծում ու տարբեր անհիմն պատճառաբանություններով կա՛մ մերժում են նրանց վարկ տրամադրել կա՛մ էլ այնքան խնդիրներ ու դժվարություններ են ստեղծում նրանց համար, որ խեղճ գյուղացին այլևս թքած է ունենում այդ վարկի վրա»,- «Առաջին լրատվական»-ի հետ զրույցում նշեց Հրաչ Բերբերյանն ու միևնույն ժամանակ հավելեց նաև.
«Ես գտնում եմ, որ անտոկոս վարկն անիմաստ բան է, որովհետև միջազգային նորմերով գյուղացիական վարկերը 2-5 տոկոսով տրվող վարկերն են, որոնք բավականին ձեռնտու են գյուղատնտեսությամբ զբաղվողների համար: Հիմա մեր գյուղացիների շատ չնչին տոկոսին է հաջողվել օգտվել այդ անտոկոս վարկերից, որը, բնականաբար, չի կարող որևէ լուրջ ազդեցությություն ունենալ ընդհանուր առմամբ գյուղատնտեսական ոլորտի զարգացման վրա. մի մեծ գյուղից, որտեղ բնակչության 80-90 տոկոսի հիմնական զբաղվածությունը հողի մշակումն է, գյուղմթերքի արտադրությունն է՝ ընդամենը 2-3 տոկոսն է կարողանում բանկերի այդ նախապայամաններին համապատասխանել ու զրո տոկոսով վարկ ստանալ, բա սա ինչպե՞ս կարող ես գյուղացուն մեկնված օգնության ձեռք համարել՝ հատկապես այս պայամաններում, երբ ամբողջ աշխարհն առաջիկայում կարող է հայտնվել պարենի նվազման խնդրի առաջ»:
Բերբերյանը մեկ անգամ ևս նշեց, որ կառավարության կողմից տրվող սուբսիդիաները պետք է ստանան հենց ֆերմերները, այլ ոչ թե միջնորդ բանկերը, որոնք նրա խոսքով՝ «լափում են այդ փողը՝ առանց գյուղացու մասին մտածելու»:
«Շատ լավ հասկանում ենք կառավարության չինովնիկներին, որոնց համար ավելի հեշտ է աշխատել մի քանի բանկերի հետ, քան իրենց նեղություն տալ, մի քիչ շատ ջանք թափել ու գտնել, հաշվառել այդ ծրագրերից օգտվելու կարիքն իրականում ունեցողներին: Հայաստանում գյուղատնտեսության սեզոնը սովորաբար սկսվում է մարտ ամսից, բայց մեր կառավարությունը նաև գյուղացիներին աջակցություն տրամադրելու, այդ վարկը տալու հարցը սկսեց քննարկել ապրիլ ամսվա երկրորդ կեսից, ինչը բերեց նրան, որ գյուղացին բանկի «թեթև ձեռքով» այդ վարկը ստացավ մայիս ամսին, երբ արդեն իր ցանքը կատարել-վերջացրել էր»,- ասաց Հրաչ Բերբերյանը` այս համատեքստում նկատելով նաև, որ արդեն տևական ժամանակ սահմանների փակ լինելու պատճառով գյուղացիներն այսօր կանգնած են նաև պարարտանյութ չունենալու խնդրի առջև:
«Առաջիկայում կարտոֆիլի և բանջարեղենի մշակման ակտիվ սեզոնն է ու գյուղացին պարարտանյութ չունի, բա ինչ են անելու, գյուղացին ոնց ա բերք ստանալու… թող կառավարությունը սրա մասին մտածի, թե չեն մենակ կաբինետներում նստելով ու կիլոգրամներով պարգևավճարներ ստանալով չի»,- եզրափակեց նա:
