«Հավաստի տեղեկություններով՝ 2012թ. Աժ ընտրություններում ՀՀԿ համամասնական ցուցակն էականորեն տարբերվելու է նախորդից: Հանրապետության նախագահը որոշել է, այսպես ասած, «խուզել» ցուցակը:
Ցուցակում հայտնվելու մեծ հավանականություն են փայփայում ՄԻԱԿ-ի տղաներն ու աղջիկները: Արդեն անուններն են շոշափվում՝ Գերասիմ Բարսեղյան և Նաիրա Կարապետյան: Նույնիսկ ՀՀԿ-ում կատակում են, թե ցուցակում հայտնվելու համար պետք է դառնալ ՄԻԱԿ-ի անդամ»,- գրում է «Հրապարակ»-ը և հավելում.
«Սակայն ՀՀԿ երիտթևը, մեր տեղեկություններով, ճնշել է ՄԻԱԿ-ի տղաներին՝ ասելով, որ «հանգիստ մնան»: Ցուցակում կլինեն ռազմական փորձագետ Դավիթ Ջամալյանը, լրագրող Մարգարիտ Եսայանը, քաղաքագետ Մենուա Հարությունյանը: Վերջինս նույնիսկ ասել է, թե «ինչո՞վ են ՄԻԱԿ-ի ժելեած մազերով երիտասարդներն առավել իրենից»: Պակաս անհանգիստ չեն հայրիկները, ովքեր ուզում են իրենց որդիներին տեսնել Աժ-ում:
Նման ցանկություն ունի Սահմանադրական դատարանի անդամ Կիմ Բալայանը, և նրան խոստացել են, որ որդին՝ արտաքին գործերի նախարարի խոսնակ Տիգրան Բալայանը, կլինի ցուցակում: Գեներալ Մանվել Գրիգորյանն էլ է ուզում Էջմիածնի քաղաքապևո որդուն՝ Կարենին, տեսնել ՀՀԿ ցուցակում:
Երիտասարդների պապաներն արդեն բանակցում են ՀՀԿ-ի «պապաների» հետ: Սակայն վերջիններս նույնպես անհանգիստ են իրենց համար: Գալուստ Գրիգորիչն օրինակ՝ չի կարողանում ճշտել, թե կրկին ի՞նքն է լինելու ֆրակցիայի նախագահ, թե՞ ոչ: Մեկ այլ պատգամավոր՝ Վազգեն Կարախանյանը, նույնպես անտրամադիր է՝ նա այս անգամ չունի «դաբրո»: Պատմում են, որ նա այդ փաստը շատ ծանր է տանում և նեղվել է ՀՀ նախագահից:
Իսկ այ Հովիկ Արգամիչը չի ուզում համամասնական ցուցակում ու նաև Աժ-ում տեսնել ՀՀԿ խոսնակ Էդուարդ Շարմազանովին և ամեն ինչ անում է, որպեսզի նրան պաշտոն տան: Սակայն, հավաստի աղբյուրներով՝ Սերժ Սարգսյանը հայտարարել է, որ Շարմազանովը մնալու է խորհրդարանում: Ամեն դեպքում, ո՛չ Գրիգորիչը, ո՛չ Արգամիչը չեն կարողանում հստակ ասել, թե ով է ՀՀԿ ցուցակում լինելու։ Ցուցակը կազմելու է մեծ «պապան»՝ Ս. Սարգսյանը: