Կառավարությունը հույս ուներ, որ Ամուլսարի հանքի հետ կապված քրեական գործն արդեն իսկ հանգուցալուծված կլիներ, սակայն կորոնավիրուսը այդտեղ էլ իր բացասական ազդեցությունն ունեցավ։ Այդ մասին ասուլիսի ժամանակ հայտարարել է ՀՀ վարչապետ Նիկոլ Փաշինյանը։ ««Էլարդ»-ի փորձագետները պետք է գային շատ կարևոր մի հարցաքննության մասնակցելու համար՝ այս ընթացքում կուտակված բազմաթիվ հարցերի պատասխանելու, սակայն կորոնավիրուսի պատճառով նրանք չկարողացան ժամանել»,- նշել է Փաշինյանը։
Վարչապետի համոզմամբ՝ Ամուլսարի հարցի լուծման բանաձևը քրեական գործի օբյեկտիվ ընթացքն է և օբյեկտիվ հանգուցալուծումը։
«Առաջին լրատվական»-ի հետ զրույցում բնապահպան, Ջերմուկի բնակիչ Շիրակ Բունիաթյանը նշեց՝ Ամուլսարում հանքարդյունաբերության էջը փակված է՝ անկախ նրանից՝ «Էլարդ»-ի փարձագետները կգան, թե այլ փորձագետներ։ «Մեզ չի հետաքրքրում՝ որոշումը կլինի հօգուտ Ամուլսարի փրկության, թե դրան դեմ։ Ժողովուրդն իր որոշումը կայացրել է։ Մնում է կառավարությունը համակերպվի այդ որոշման հետ, ընդունի ու օգնի, որ այս հարցն ավելի արագ լուծվի, ու մարդիկ գնան իրենց տները»,- ասաց մեր զրուցակիցը և հիշեցրեց՝ Ջերմուկում Նիկոլ Փաշինյանի հետ հանդիպման ժամանակ այս նույն մտքերը հնչեցրել են ու իրենց կարծիքում ոչինչ չի փոխվել։
Բնապահպանի խոսքերով՝ մարդկանց մոտ Ամուլսարի հարցն արմատավորված է այնպես, ինչպես Արցախի հարցը։ «Երբեք հետքայլ չի լինելու Ամուլսարի հարցում։ Հիշո՞ւմ եք «Էլարդ»-ի հետ առցանց կոնֆերանսը։ Դրանից հետևություն անելով՝ կարող ենք ասել, որ փորձագետները Ամուլսարի ծրագրում լիքը խնդիրներ են հայտնաբերել։ Եթե իրենց մասնագիտական կարծիքում փոփոխություն լինի, դա կլինի իրենց խնդիրը։ Ամուլսարի ճանապարհները փակողները այն մարդիկ են, որոնք ակտիվ մասնակցություն են ունեցել հեղափոխությանը։ Ոչ միայն ջերմուկցիները։ Ամուլսարի պաշտպանության դեմ հանդես են գալիս հիմնականում նույն մարդիկ, որոնք արեցին հեղափոխությունը։ Եթե կառավարությունը կպնդի, որ պետք է բացվի սար տանող ճանապարհը, ուրեմն մեր և կառավարության ճանապարհները բաժանվում են, ու մենք այլևս նույն ուղղությամբ չենք նայում»,- ասաց բնապահպանը՝ ավելացնելով՝ իրենք պատրաստ են բոլոր սցենարներին։
Շիրակ Բունիաթյանի խոսքերով՝ եթե կառավարության քայլերը կլինեն ընդդեմ Ամուլսարի, վստահ եմ՝ դա կտանի քաղաքական ուժի ինքնասպանությանը, որն իրենք չեն ուզում։
Մեր զրուցակիցը հավելեց, որ այս պահին Ամուլսարի ճանապարհին՝ կապված կորոնավիրուսային իրավիճակի հետ, սահմանվել է հերթապահություն, մեծ թվով մարդիկ չկան։ «Մենք պոստերը սարքել ենք շրջիկ։ Հիմնականում ցերեկային ժամերին այնտեղ միշտ մարդիկ կան։ Փորձում ենք շատ կուտակումներ չանել»,- ասաց բնապահպան, Ջերմուկի բնակիչ Շիրակ Բունիաթյանը։
