Ազգային վիճակագրական ծառայությունն այսօր հրապարակել է ՀՀ վճարային հաշվեկշիռի հաշվետվությունը 2000-2010 թթ. համար:
Ըստ այդմ՝ ընթացիկ տրանսֆերտների պիկը 10 տարվա կտրվածքով գրանցվել է 2008 թ.՝ 1137.63 մլն դոլար: 2002-2007 թթ. տրանսֆերտների ծավալները սահուն ավելացել են:
2008-ի համեմատ 2009-ին տրանսֆերտների ծավալները կրճատվել են 29%-ով՝ կազմելով 813.92 մլն դոլար, իսկ 2009-ի համեմատ 2010 թ. դրանք կրճատվել են 31%-ով:
Նկատենք, որ տրանսֆերտների ծավալները կրճատման միտումներ ունեն նաև 2011 թ., թեև ՀՀ-ում դիտվող արտագաղթի ծավալների ավելացումն իշխանության ներկայացուցիչներն անվանում են աշխատանքային արտագաղթ: Այսինքն՝ մեր հայրենակիցները մեկնում են արտասահման աշխատելու նպատակով և, ենթադրաբար, պետք է այնտեղից ֆինանսական միջոցներ ուղարկեին իրենց ընտանիքներին, ինչի արդյունքում էլ, էլի ենթադրաբար, պետք է ավելանային տրանսֆերտների ծավալները:
