«Քաղաքացու իրավունքների պաշտպան» ՀԿ նախագահ Կարեն Հեքիմյանը հայցադիմում է ներկայացրել Ընդհանուր իրավասության դատարան և պահանջում է անվավեր ճանաչել ԵՊՀ հոգաբարձուների խորհրդի համապատասխան որոշումը, որով Գեղամ Գևորգյանը նշանակվել է ռեկտորի ժամանակավոր պաշտոնակատար։
Հեքիմյանը դատարանից պահանջում է նաև դադարած համարել Գեղամ Գևորգյանի լիազորությունները որպես ԵՊՀ ռեկտորի ԺՊ։ Այդ մասին «Առաջին լրատվական»-ի հետ զրույցում ասաց Հեքիմյանը՝ հավելելով, որ Գեղամ Գևորգյանը ապօրինի կերպով է ընտրվել ԵՊՀ ռեկտորի ժամանակավոր պաշտոնակատար, և դա անհետևանք չպետք է մնա։
Իր գործողությունների հիմքը, ՀԿ նախագահը համարում է այն, որ Գևորգյանը իր պաշտոնի հետ անհամատեղելի աշխատանք է իրականացնում, որը վճարովի աշխատանք է։ «Գեղամ Գևորգյանը 2017 թվականից հանդիսանում է «Էվոկաբանկ»-ի խորհրդի անդամ։ Իսկ 2019 թվականի սեպտեմբերից Գևորգյանը նույն բանկի խորհրդի նախագահի տեղակալն է։ Մինչդեռ, Հիմնադրամների մասին օրենքի 27-րդ կետով սահմանվում է, որ եթե ԵՊՀ ռեկտորը կամ ռեկտորի ժամանակավոր պաշտոնակատարը, եթե զբաղեցնում է այլ՝ վճարովի պաշտոն, ապա նա պետք է տեղյակ պահի հոգաբարձուների խորհրդին, և հոգաբարձուների խորհուրդը պետք է համաձայնությունը տա։ Իսկ «էվոկաբանկ»-ի կանոնադրությունում նշված է, որ բանկի խորհրդի անդամները վճարվում են ամսական կտրվածքով։ Եվ, բացի աշխատավարձից, այդ մարդիկ ստանում են նաև պարգևատրումները, որը միանշանակ ապացուցում է այն հանգամանքը, որ Գեղամ Գևորգյանը վճարովի աշխատանք է իրականացնում այն աշխատավայրում՝ «Էվոկաբանկ»-ում»,- ասաց Հեքիմյանը։ Ավելին, ըստ մեր զրուցակցի՝ Կենտրոնական բանկը մի որոշում ունի, որը սահմանում է, որ ցանկացած բանկի խորհրդի անդամ պետք է վարձատրվի։ Նույն որոշման համաձայն՝ յուրաքանչյուր բանկի խորհրդի անդամի պաշտոնի համատեղումն այլ գործունեության հետ կարող է բացասաբար անդրադառնալ վերջինիս պարտականությունների պատշաճ կատարման վրա, ինչպես նաև տվյալ բանկի ընդհանուր կառավարման վրա։
«Այսինքն՝ Կենտրոնական բանկը իրավական ակտ է կայացրել, որ ցանկացած բանկի խորհրդի անդամ պետք է վարձատրվի, իսկ եթե նա ուզում է ուրիշ տեղ աշխատել, ապա դա բացասաբար կանդրադառնա նրա աշխատանքի արդյունավետության վրա։
Հիմա փաստացի ստացվում է, որ Գեղամ Գևորգյանը վարձատրվում է «էվոկաբանկ»»-ում որպես խորհրդի անդամ։ Ինձ համար նաև միանշանակ է, որ իր վարձատրվելու մասին տեղեկատվությունը ժամանակին չի հաղորդվել հոգաբարձուների խորհրդին։
Այնինչ, ԵՊՀ հոգաբարձուների խորհուրդը պետք է դրա մասին իմանար և տար իր համաձայնությունը։ Այսինքն՝ եթե վերլուծում ենք բոլոր հանգամանքները, ապա ստացվում է, որ Գեղամ Գևորգյանը ապօրինի կերպով է ընտրվել որպես ռեկտորի ժամանակավոր պաշտոնակատար»,-ասաց Հեքիմյանը՝ ավելացնելով, որ եթե պարզվի, որ Գեղամ Գևորգյանը, նախապես իմանալով, որ իր այլ տեղում վճարովի աշխատանք կատարելը արգելք է և չի տեղեկացրել հոգաբարձուների խորհրդին, կամ հոգաբարձուների խորհուրդը իմացել է, բայց ոչ մի տեղ դա չի արձանագրվել, դա արդեն քրեական տարրեր պարունակով արարք է հանդիսանում։
Նշենք, որ անցած տարի մայիսին, ԵՊՀ հոգաբարձուների խորհրդի որոշմամբ՝ բուհի ռեկտորի ժամանակավոր պաշտոնակատար նշանակվեց ԵՊՀ նախկին պրոռեկտոր Գեղամ Գևորգյանը, նա լրագրողների հետ զրույցում հաստատել էր, որ «Էվոկաբանկ»-ում բաժնեմաս ունի և դա չի խանգարում իրեն վարչական աշխատանքով զբաղվելու համար։
Երեկ իր նշանակումը անվավեր ճանաչելու վերաբերյալ հայցադիմումի հետ կապված մեկնաբանություն ստանալու նպատակով զանգահարեցինք Գևորգյանին, սակայն բարևելուց և ներկայանալուց անմիջապես հետո, վերջինս առանց հարցն անգամ լսելու անջատեց հեռախոսը՝ այդպիսով հրաժարվելով պատասխանել մեր հարցերին։
Լուսանկարը՝ Armeniasputnik-ի
