«Ազատություն» ռադիոկայանի փոխանցմամբ վարչապետ Տիգրան Սարգսյանը Օշականում ուրբաթ օրը հանդիպել է մեծ ծավալներ ստացած արտագաղթի սպառնալիքի մասին ահազանգող մտավորականների հետ:
Մտավորականները այս ամսվա սկզբին վարչապետին և Ազգային ժողովի նախագահին հասցեագրված նամակում ասել էին, թե «արտագաղթը Հայաստանից վերածվում է տնտեսական և ազգային աղետի»:
Հայաստանի գրողների միության անդամների և մտավորականների հետ հանդիպման ժամանակ վարչապետը հայտարարել է, որ կառավարությանը ևս մտահոգում է Ռուսաստանի «Համերկրացիներ» ծրագրով Հայաստանից Ռուսաստան մեկնելու գործընթացը:
«Համերկրացիներ» ծրագիրը հնարավորություն է տալիս Հայաստանի քաղաքացիներին ընտանիքներով մեկնել Ռուսաստան, ստանալ այդ երկրի քաղաքացիություն և մշտական աշխատանք:
Տիգրան Սարգսյանը ասել , որ հանրապետության նախագահի հանձնարարականով այս հարցը քննարկվել է Ռուսաստանի Ռոստով քաղաքում կայացած հայ-ռուսական միջկառավարական հանձնաժողովի նիստում:
«Մենք մեր ռուս գործընկերների ուշադրությունը հրավիրել ենք այս հանգամանքի վրա, որ Հայաստանի Հանրապետությունում այդ ծրագիրը այդ ստանդարտներով չի կարելի իրականացնել, և այս խնդիրը դառնալու է միջպետական մակարդակով քննարկումների առարկա, արձանագրվել է մեր հանդիպման ժամանակ և մենք պետք է քաղաքական մակարդակում այս խնդիրը լուծենք», – ասել է վարչապետը:
Ազգային ժողովի նախագահին և վարչապետին հասցեագրված բաց նամակին միացած բանասիրական գիտությունների դոկտոր, պրոֆեսոր Ազատ Եղիազարյանը «Ազատություն» ռադիոկայանի հետ զրույցում, մեջբերելով միջազգային կազմակերպությունների կողմից անցկացված հարցման արդյունքները, ասել է, թե Հայաստանի բնակչության 40-44 տոկոսը իր ապագան Հայաստանում չի տեսնում:
«Իմ տպավորությամբ սա տագնապալից խնդիր է, վարչապետը արձագանքեց հարցին, բայց ես չգիտեմ կառավարությունում այդ տագնապը կա, թե ոչ», – ասաց Եղիազարյանը:
Վարչապետը մտավորականների հետ հանդիպման նշել է, որ իրենք ևս տագնապած են: Նա ներկայացրել է այն գործոնները, որոնք ստիպում են հայաստանցուն արտագաղթել:
«Հիմնական մասը դա բացատրում է աշխատատեղի բացակայությամբ, մասնավորապես, այնպիսի աշխատատեղի, որ նա կարողանա արժանավայել իր կյանքը կառուցի Հայաստանի Հանրապետությունում», – ասել է վարչապետը: