Грузия Online-ի փոխանցմամբ՝ Իլիա Ճավճավաձեի անվան պետական համալսարանի պրոֆեսոր, լրագրող Օլեգ Պանֆիլովի «Ռուսաստան-Վրաստան տեղեկատվական պատերազմ. Օգոստոս 2008» խորագրով նոր գիրքը նվիրված է ռուս-վրացական տեղեկատվական դիմակայությանը։
Գրքում տեղ են գտել նաև 2008 թվականի օգոստոսյան պատերազմի տեղեկատվական հատվածին և անմիջականորեն հնգօրյա ռազմական գործողություններին, ինչպես նաև մի քանի տարվա տեղեկատվական պատերազմին առնչվող նյութերը։
Գրքում նշված է, թե ինչպես են ռուսական լրատվամիջոցները Վրաստանի դեմ քարոզչություն իրականացնում։ Գրքի կարևոր մասը կազմում են Ռուսաստանում անցկացված սոցիոլոգիական հետազոտությունների արդյունքները, որոնք ի ցույց են դնում հասարակական կարծիքի ձևավորումը։
Բերված են քարոզչական բազմաթիվ օրինակներ, որոնք կոչված են եղել ոչ միայն ռուսական հասարակական կարծիքը փոխելուն, այլև ապատեղեկատվության գործածմամբ պատերազմի սկսման հարցում ռուսական տարբերակի հաստատմանը։
Գրքի շնորհանդեսը տեղի է ունենալու օգոստոսի 7-ին Թբիլիսիի Օկուպացման թանգարանում։
Հիշեցնենք, որ 2008 թվականի ռուս-վրացական օգոստոսյան պատերազմը մեկնարկել է հենց օգոստոսի 7-ին։
Ի դեպ, այս տարվա ապրիլի 26-ին էլ տեղի էր ունեցել Պանֆիլովի «Չեչնիայի տեղեկատվական շրջափակումը (1996 սեպտեմբեր – 2002 դեկտեմբեր)» խորագրով գրքի շնորհանդեսը։