Վարչապետ Նիկոլ Փաշինյանը բավականին կոշտ է արձագանքել ֆինանսների նախկին նախարար Գագիկ Խաչատրյանի որդու հայտարարությանը, որում Գուրգեն Խաչատրյանը նշել էր, որ իշխանության բարձր մակարդակով դրված է իրենց պատկանող Յուքոմ ընկերությունը վերացնելու խնդիր և կայացված է Գուրգեն Խաչատրյանի և նրա եղբոր, նաև ընտանիքի մյուս անդամների հանդեպ հետապնդումների որոշում:
Վարչապետի խոսնակ Մանե Գևորգյանը հայտարարել է, որ վարչապետ Փաշինյանի խոսքերին ու ելույթներին ի պատասխան՝ որ պետք է վերադարձվեն նախկին համակարգում յուրացված միլիոնները, տարբեր խողովակերով հայտնել են վերադարձնելու պատրաստակամություն: Դատելով խոսնակի արձագանքից, հնարավոր է եզրակացնել, որ իշխանությունն ու Խաչատրյանները չեն պայմանավորվում այսպես ասած վերադարձվելիքի չափի շուրջ: Չեն պայմանավորվում, կամ գուցե ավելի շուտ չեն կարողացել պայմանավորվել և իշխանությունն անցել է ավելի կոշտ քայլերի, թելադրելով այսպես ասած միակողմանի պայմաններ: Վարչապետի խոսնակը հայտարարել է, որ կառավարությունը թույլ կտա Յուքոմի՝ Խաչատրյաններին պատկանող բաժնեմասի օտարում, եթե այդ օտարումից ստացված փողը վերադարձվի պետությանը:
Միաժամանակ, Նիկոլ Փաշինյանի խոսնակը հիշատակում է, որ Յուքոմում՝ իր խոսքով կոռուպցիոն բաժնեմաս ունի նաև Միքայել Մինասյանը՝ Սերժ Սարգսյանի փեսան: Այդպիսով, Գուրգեն Խաչատրյանի, իսկ հետո վարչապետի մամուլի խոսնակի հայտարարությունները փաստորեն բացահայտում են հայկական բջջային խոշոր օպերատորի շուրջ վերջին օրերին ստեղծված վիճակի քաղաքական տողատակը: Այլ կերպ ասած, կողմերը սկսում են խաղալ բացված խաղաքարտերով:
Մնում է հասկանալ, խաղը Փաշինյան-Խաչատրյաններ-Մինասյան շրջանակն է ներառում, թե ավելի լայն, եթե նկատենք, որ Գագիկ Խաչատրյանին կաշառք տալու մեղադրանքով ԱԱԾ-ն կալանավորել է Գագիկ Ծառուկյանին պատկանող Մուլտի գրուպ կոնցեռնի գործադիր տնօրեն Սեդրակ Առուստամյանին: Դա նշանակո՞ւմ է, որ գործընթացը ներառում է նաև Ծառուկյանին: Ի դեպ, այդ ֆոնին հատկանշական է մեկ այլ տեղեկություն, որ օրերս հրապարակվել էր մամուլում, այն մասին, որ Սերժ Սարգսյանը ԱԱԾ-ում հարցաքննվել է որպես վկա՝ կաշառքի մի գործով: Եվ, ի դեպ, մամուլում այդ տեղեկությունը հայտնվել էր այն համատեքստում, որ այդ հարցաքննությունը նաև առիթ է եղել ԱԱԾ մեկուսարանում գտնվող Ռոբերտ Քոչարյանի և Սերժ Սարգսյանի հանդիպման համար: