Ապրիլի 23-ը համարվում է թավշյա հեղափոխության կուլմինացիայի օրը: 2018 թվականի այս օրը՝ ապրիլի 23-ին, վարչապետի պաշտոնից հրաժարական տվեց Սերժ Սարգսյանը, ինչն անկյունաքարային դարձավ թավշյա հեղափոխության հաղթանակի համար։
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Գոռ Մադոյանը, «Իրազեկ քաղաքացիների միավորում» ՀԿ համակարգող Դանիել Իոաննիսյանը և «Իմ քայլը» խմբակցության պատգամավոր Նիկոլայ Բաղդասարյանը:
«Ինձ համար հեղափոխության սկիզբը ապրիլի 16-ն էր, ավարտը դեկտեմբերի 9-ը, երբ տեղի ունեցան արտահերթ ընտրությունները: Դա բավական երկար պրոցես էր: Բայց փաստացի Սերժ Սարգսյանը իշխանությունը կորցրեց ապրիլի 23-ին, և դրան հաջորդող օրերը ցույց տվեցին, որ իշխանությունն այլևս ՀՀԿ-ին չի պատկանում, այլ ժողովրդին: Ըստ էության՝ ժողովուրդը և Նիկոլ Փաշինյանն էին որոշումներ կայացնում: Տասնամյակներ տևած կոռումպացված իշխանությունն այլևս չուներ իշխանություն, չէր տիրապետում իրավիճակին»,- նշեց Դանիել Իոաննիսյանը:
Գոռ Մադոյանի դիտարկմամբ՝ հեղափոխական գործընթացները սկսվեցին երկու տարի առաջ, և ամենահեշտ գործն ավտոկրատին տուն ուղարկելն էր, դժվար գործողությունները սկսվում են դրանից հետո, երբ պետք է պայքարել ինստիտուտների դեմ, որոնք պետությունը վերցրել էին իրենց ձեռքը և դեռ դիմադրում են: «Հեղափոխությունը չի ավարտվել: Վարչապետը երբ որ խոսում էր սահմանադրական հանրաքվեի մասին, ինչպես նաև այն մասին, որ համակարգը դիմադրում է, ըստ էության՝ խոսում էր հեղափոխության շարունակականության մասին… Դասական առումով հեղափոխությունը տևում է հինգ տարի, կարծում եմ՝ դեռ հեղափոխության ընթացքի մեջ ենք»,- նշեց վերլուծաբանը:
Դանիել Իոաննիսյանը հավելեց, որ համամիտ է՝ հեղափոխությունը չի ավարտվել: «Եկավ մի պահ, երբ պետության զավթումը դադարեցվեց… Պետության զավթման կանխարգելման համար բարձր լեգիտիմություն ունեցող Ազգային ժողովը պետք է գնահատական տա անցյալին, թե ինչպես է զավթվել պետությունը և ինչպես է այդ զավթումն արտահայտվել»:
Նիկոլայ Բաղդասարյանը հավելեց, որ նախկին քաղաքական համակարգին, իհարկե, պետք է տրվի քաղաքական գնահատկան. «Եղել են դրվագներ, երբ ԱԺ նախագահը տվել է գնահատականներ, բայց համամիտ եմ, որ գնահատականները պետք է հնչեն հայտարարության տեսքով… Սակայն հարց է առաջանում, դա պետք է լինի ռեվոլյուցիո՞ն, թե՞ էվոլյուցիոն ճանապարհով: Կարծում եմ՝ պետք է լինի էվոլյուցիոն ճանապարհով, հնարավոր չէ կտրուկ քայլերով փոխել մարդկանց մտածողությունը…»:
Անդրադառնալով ՌԴ արտգործնախարար Լավրովի հայտարարությանն այն մասին, թե բանկցային սեղանին դրված է մի փաստաթուղթ, որը Արցախյան հարցի կարգավորման «փուլային տարբերակն» է, Նիկոլայ Բաղդասարյանն ընդգծեց, որ Լավրովի հայտարարությունը Սերժ Սարգսյանի սխալ արտաքին քաղաքականության հետևանքն է: «Նոր իշխանության ճիշտ քաղաքականության արդյունքում մեր երկրի կշիռը բարձրացավ արտաքին հարթակներում»,- նշեց պատգամավորը:
Մանրամասն՝ տեսանյութում:
