Վրաստանի Սամցխե Ջավախքի շրջանում ապրիլի 19-ին կորոնավիրուսի վարակման առաջին դեպքն է գրանցվել: Նինոծմինդայի և Ախալքալաքի մեծամասնական կարգով ընտրված պատգամավոր Հենզել Մկոյանը «Առաջին լրատվական»-ի հետ զրույցում նշեց, որ դեպքը գրանցվել է Բորջոմի շրջանում, Ախալդաբա գյուղի 30-ամյա բնակիչ է վարակվել:
«Իր ընտանիքի բոլոր անդամները մեկուսացված են, ում հետ շփվել է, բոլորի հետ համապատասխան աշխատանք է տարվում: Ես այդտեղ վտանգ չեմ տեսնում: Ուրախալի լուր էլ կա, որ ում հետ ինքը շփվել է, նրանց մոտ կորոնավիրուս չի հայտնաբերվել: Նրանց բոլորին թեստ են արել, և բացասական արդյունք է եղել»,- ասաց Մկոյանը:
Նա տեղեկացրեց, որ վարակված տղամարդը վրացի է, մաքսատան աշխատող է, աշխատում է Թբիլիսիում, այնտեղից է եկել: Մենակ իր մոտ է հաստատվել վիրուսը, մնացած ոչ մեկի մոտ չի հայտնաբերվել:
Հենզել Մկոյանը հավելեց, որ Ախալքալաքի հիվանդանոցները, բժիշկները շատ բարձր մակարդակով պատրաստ են. «Բայց այս պահին մեզ մոտ խուճապի առիթ չկա: Արդեն 4-րդ օրն է, որ ամբողջ Վրաստանի տարածքում երթևեկությունն արգելված է: Փողոցում մարդիկ կամ հեծանիվով են, կամ ոտքով: Վաղը մեզ մոտ խորհրդարանի նիստ է, որի ժամանակ ուզում են կարանտինի ժամկետը երկարացնել մինչև մայիսի 10-ը: Նաև խոսակցություն կա, որ երթևեկության մասով էլ սահմանափակումները երկարացվեն»:
Նշենք, որ Սամցխե Ջավախքի նահանգապետ Բեսիկ Ամիրանաշվիլին հայտարարել է, որ վարակված տղամարդը շփում է ունեցել 8 մարդու, այդ թվում՝ քրոջ հետ, որն անցել է կորոնավիրուսի թեստը, պատասխանը բացասական է եղել:
Պատգամավորը հավաստիացրեց, որ Ջավախքի հիվանդանոցներում թեստերի պակաս չկա, ավելին՝ չկա նաև շնչառական սարքերի խնդիր: «Կան մարդիկ, որոնք անգամ եթե մի փոքր տաքություն են ունեցել, հանձնում են թեստեր»,- ասաց պատգամավորը՝ հավելելով, որ քաղաքացիները ենթարկվում են սահմանափակումներին, ունեն պատասխանատվության բարձր մակարդակ. «Վրաստանը կարծես դարձել է Գերմանիա, ես զարմացած եմ։ Ես չգիտեի, որ մեր քաղաքացիներն այսքան ճշտապահ են, մեծ պատասխանատվություն ունեն, ամեն երեկո 21։00-ից հետո քաղաքացիները դուրս չեն գալիս տնից, երթևեկությունը կանգնած է, և հանրությունը չի դժգոհում, քանի որ գիտի՝ կառավարությունն այս ամենն անում է հանրության առողջության համար»։
Պատգամավորը նշեց, որ Ջավախքում որևէ դեպք չի գրանցվել, Ջավախքը շարունակում է համարվել կանաչ գոտի։
