Երեկ Ռուսաստանի Դաշնության նախագահ Դմիտրի Մեդվեդևը իր բլոգում տեղադրված ելույթում մտահոգություն է հայտնել, որ երկրում քաղաքական գործընթացների լճացում է տեղի ունենում, ինչը կործանարար է ինչպես իշխող կուսակցության համար, որը «ժանգոտում է», այնպես էլ ընդդիմության համար, որը մարգինալացվում է: Այս հայտարարությունը բավականին անսպասելի էր և հնչել է երեկ երեկոյան: Հավանաբար այն առնչվում է խորհրդարանական խմբակցությունների ղեկավարների հետ այսօրվա իր հանդիպմանը:
«Որոշակի ժամանակից սկսած` մեր քաղաքական կյանքում ի հայտ եկան լճացման երևույթներ, վտանգ է առաջացել, որ կայունությունը կարող է վերածվել արգելափակման գործոնի: Իսկ այդօրինակ լճացումը կործանարար է ինչպես իշխող կուսակցության, այնպես էլ ընդդիմադիր ուժերի համար: Եթե ընդդիմությունը ոչ մի հնարավորություն չունի հաղթելու արդար պայքարում, այն նահանջում է և դառնում մարգինալացված: Բայց եթե իշխող կուսակցությունը ոչ մի հնարավարություն չունի ինչ որ տեղ պարտվելու, ապա այն ուղղակի «ժանգոտում է» և ի վերջո դեգրադացվում, ինչպես ցանկացած կենդանի օրգանիզմ, որը հայտնվում է անշարժ վիճակում»,- հայտարարել է Ռուսաստանի նախագահը:
«Մեր հիմնական խնդիրը, ցանկացած ժողովրդավարության խնդիրը այն է, որ ավելացվի ժողովրդական ներկայությունը. այնպես անել, որ քաղաքական մեծամասնությունը չլինի ստատիկ վիճակում, իսկ ավելի հստակ, որ այն չվերածվի ստատիստներից և կատարողներից կազմված մեծամասնության, որ իշխող կուսակցությունը ունենա և իրավունքներ և պարտականություններ, այլ ոչ թե կցորդ լինի գործադիր իշխանությանը»,- ավելացրել է նա:
