Վերաքննիչ քրեական դատարանը մերժել է Սերժ Սարգսյանի շահերի պաշտպանների բողոքը:
Պաշտպանները վերաքննիչ ատյանում բողոքարկել էին Երևանի ընդհանուր իրավասության դատարանի կողմից ավելի վաղ իրենց միջնորդությունը մերժելու վերաբերյալ որոշումը:
Պաշտպանական կողմը միջնորդել էր վերացնել Սերժ Սարգսյանի խափանման միջոցը՝ չհեռանալու մասին ստորագրությունը:
Մինչդատական վարույթում պաշտպանական կողմը նման միջնորդություն էր ներկայացրել նաև գործի քննությունը հսկող դատախազին, բայց միջնորդությունը մերժվել էր անհիմն լինելու պատճառաբանությամբ:
Ներկայումս Սերժ Սարգսյանի խափանման միջոցի վերացման վերաբերյալ միջնորդությունը մերժվել է նաև դատական երկու ատյաններում:
Հիշեցնենք, որ Սերժ Սարգսյանի հետ նույն գործի շրջանակներում մեղադրվում են նաև գյուղատնտեսության նախկին նախարար Սերգո Կարապետյանը, գյուղատնտեսության նախարարի նախկին տեղակալ Սամվել Գալստյանը, գյուղատնտեսության նախարարության բուսաբուծության վարչության նախկին պետ Գևորգ Հարությունյանը և «Ֆլեշ» ՍՊԸ սեփականատեր Բարսեղ Բեգլարյանը:
Սերժ Սարգսյանը մեղադրվում է իր պաշտոնեական դիրքն օգտագործելով՝ պաշտոնատար մի խումբ անձանց կողմից վատնելու եղանակով առանձնապես խոշոր չափերի՝ 489 միլիոն 160 հազար 310 դրամ գումարի հափշտակությունը կազմակերպելու համար՝ ՀՀ քրեական օրենսգրքի 38-179 հոդվածի 3-րդ մասի 1-ին կետով:
Գործը Երևանի ընդհանուր իրավասության դատարանում քննվում է Վահե Միսակյանի նախագահությամբ:
Նշենք, որ այս գործով առաջիկա նիստը նշանակված է ապրիլի 23-ին: Դա, հիշեցնենք, 2018 թվականին Սերժ Սարգսյանի հրաժարականի ու Թավշյա հեղափոխության փաստացի հաղթանակի պատմական օրն է:
