Տեխասում մահապատիժ է իրականացվել Մարկ Սթրոմենի նկատմամբ, որը 2001թ.-ին սպանել էր երկու ներգաղթյալների իբրև սեպտեմբերի 11-ի ահաբեկչական ակտի վրեժխնդրություն: Ինչպես հայտնում է Associated Press գործակալությունը, նրա մահապատիժն իրականացվել է հուլիսի 21-ի վաղ առավոտյան: 41-ամյա Սթրոմենին կյանքից զրկել են ներարկման միջոցով:
Հուլիսի 21-ին նշանակված մահապատիժը հետաձգվել էր որոշ ժամանակով Բանգլադեշում ծնված և Սթրոմենի հարձակումից հետո կենդանի մնացած Ռայս Բույանայի բողոքարկման հիման վրա, որն էլ դարձել էր Սթրոմենի զոհերից մեկը: Նա պատճառաբանել էր, որ իսլամն ունի մեղավորին ներելու հնարավորություն և խնդրել էր դատարանին պահպանել նրա կյանքը: Սակայն բողոքարկումը մերժվել էր վերջին ատյանի կողմից և իրականացվել էր նշանակված ժամանակահատվածում:
Սեպտեմբերի 11-ին տեղի ունեցած ահաբեկչությունից հետո Մարկ Սթրոմենը սպանել էր Պակիստանի և Հնդկաստանի քաղաքացիների և վիրավորել Բանգլադեշի մի քաղաքացու, որն էլ հետագայում զրկվել էր աչքից: Ձերբակալությունից հետո նա ասել է, որ իր զոհերին նա ընդունել է իբրև արաբ և վրեժխնդրություն արել 2001թ.-ի սեպտեմբերի 11-ին իրականացված ահաբեկչական ակտի համար:
Սթրոմենը նաև նշել էր, որ ահաբեկչության ժամանակ մահացել է իր քույրը, սակայն դատարանը պարզել էր, որ այնտեղ նա ոչ մի քույր էլ չի ունեցել: Ֆորմալ առումով Սթրոմենը մահապատժի է ենթարկվել մեկ սպանության համար, քանի որ մյուս սպանության մանրամասները հանգամանորեն չեն քննվել: