Արցախի Հանրապետությունում այսօր կայացավ նախագահական ընտրությունների 2-րդ փուլը։ Արդյունքները դեռևս ամփոփված չեն, բայց կանխատեսելի են: Ավելի էական է ընտրության անցկացման փաստը և Արցախի բնականոն կյանքը քաղաքական ցնցումներից հեռու պահելու հանգամանքը:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը, ԱԺ «Իմ քայլը» խմբակցության պատգամավոր Տաթևիկ Հայրապետյանը և պատմաբան Դավիթ Թինոյանը:
Տաթևիկ Հայրապետյանի դիտարկմամբ՝ Արցախում ընտրությունները բարդ պայմաններում են անցկացվում՝ հաշվի առնելով ներքաղաքական կոնյուկտուրայի առանձնահատկությունը, ինչպես նաև կորոնավիրուսի տարածման հանգամանքը: «Խորհրդարանը փաստացի ձևավորված էր, և պետք էր իշխանության լիարժեք ձևավորում: Կարծում եմ՝ ընտրությունների երկրորդ փուլի անցկացումը օրվա հրամյական էր և դրանից խուսափել հնարավոր չէր»,- նշեց պատգամավորը:
Հակոբ Բադալյանի և Դավիթ Թինոյանի դիտարկմաբ՝ արցախյան ընտրությունների երկրորդ փուլին ցածր մասնակցությունը կանխատեսելի էր: «Իհարկե չմասնակցելու վերաբերյալ Մասիս Մայիլյանի կոչը ունեցավ իր ազդեցությունը և նրա ընտրազանգվածը չմասնակցեց ընտրություներին,- նշեց Հակոբ Բադալյանը:- Անկախ այդ կոչից, պանդեմիային զուգահեռ «ինֆոդեմիան», անշուշտ, իր ազդեցությունը թողեց նաև արցախցիների վարքագծի վրա, մանավանդ որ արդեն եղավ հայտարարություն այն մասին, որ Արցախում էլ կան կորոնավիրուսով վարակվածներ»:
Վերլուծաբանի դիտարկմամբ՝ ակնհայտ է, որ Արցախում տեղի է ունեցել համակարգի վերարտադրություն՝ այլ դասավորությամբ. «Իմ գնահատմամբ՝ սա պաշտոնական Երևանի հետ որոշակի փոխզիջման արդյունք է… Արցախում հիմա կա հեռահար խնդիր՝ ձևավորել, այսպես ասած, արտահամակարգային ընդդիմություն, Մասիս Մայիլյանը հայտնել է իր պատրաստակամությունը՝ նշելով, որ իր թիմը չի հրաժարվի նոր Արցախի տեսլականից: Այս ճանապարհով Արցախում պետք է փոխել ուժերի հարաբերակցությունը և Արցախը բերել քաղաքական նոր վիճակի»:
«Վիտալի Բալասանյանը քաղաքական ակտիվություն էր ցուցաբերում, բայց արցախցիների 90 տոկոսը, եթե չասենք հակակրանք ունի նրա նկատմամբ, ապա գոնե համակրանք չունի, որովհետև նա ասոցացվում է ՀՀ նախկին իշխանությունների հետ, և այս հանգամանքը ձեռնտու էր Արայիկ Հարությունյանի համար. Բալասանյանի կերպարը օժանդակեց Արայիկ Հարությունյանի ձայների ավելացմանը»,- նշեց Դավիթ Թինոյանը: Պատմաբանը նաև հավելեց, որ արցախյան ընտրությունները որոշակիորեն այլընտրանքային էին, բայց այն թեկնածուները, որոնք որոշակի թելերով կապված չէին նախկին իշխանությունների հետ, ընտրվելու շանս չունեին:
Մանրամասն՝ տեսանյութում:
