Ռուսաստանի ԱԳՆ խոսնակ Մարիա Զախարովան անդրադարձել է մարտի 31-ին Արցախում տեղի ունեցած ընտրություններին: Նա նշել է, որ այդ ընտրություններն անհրաժեշտ են բնակչության բնականոն գործունեությունն ապահովելու համար: «Այնուամենայնիվ, Ռուսաստանի Դաշնությունը չի ճանաչում Լեռնային Ղարաբաղը որպես անկախ պետություն: Նրա կարգավիճակը պետք է որոշվի քաղաքական բանակցությունների միջոցով, ինչով էլ զբաղվում է ԵԱՀԿ Մինսկի խումբը»,- ասել է Զախարովան: Ավելի վաղ, Հայաստանում ԵՄ պատվիրակությունն էր հաղորդագրություն տարածել Արցախի նախագահի և ԱԺ ընտրությունների վերաբերյալ՝ նշելով, որ ԵՄ-ն այդ ընտրությունների վերաբերյալ վերահաստատում է, որ չի ճանաչում սահմանադրական և իրավական շրջանակը, որի սահմաններում դրանք անցկացվում են։
Արցախի Հանրապետության նախագահի մամուլի խոսնակ, Արցախի նախագահի թեկնածու Դավիթ Բաբայանը, անդրադառնալով այս հայտարարություններին, «Առաջին լրատվական»-ի հետ զրույցում նշեց․«Շատ հետաքրքիր արձագանքներ են, դժբախտաբար, մենք Եվրոպայից տեսնում ենք հետևյալը, որ իրենք չեն տարանջատում ընտրությունները և միջազգային կարգավիճակը։ Սա տարօրինակ է՝ հատկապես հաշվի առնելով այն, որ այնտեղ ժողովրդավարությունն ամեն պատեհ և անպատեհ առիթներով չափվում է որպես իրենց քաղաքակրթության հիմքը։ Հիմա ի՞նչ կապ ունի մեր ճանաչված կամ չճանաչված լինելը և ժողովրդավարական համակարգի կառուցումը։ Անհասկանալի է»,-հավելեց Բաբայանը։ Նրա խոսքով՝ Արցախն ուզում է կառուցել ժողովրդավարական համակարգ և ուզում է դա անել առանց որևէ մեկին հաճոյանալու, և գիտակցաբար է ընտրել այդ ճանապարհը․ «Ինչո՞ւ մեզ չեն ճանաչում, ինչու չեն ճանաչում մեր ընտրությունը։ Գոնե ասեն, որ մենք չենք ճանաչում Արցախի Հանրապետությունը, բայց գոնե ասեն, որ կողմնակից են, որ ժողովրդավարությունը տարածվի աշխարհում և այլն։ Այս տեսակետից Ռուսաստանի դիրքորոշումն ավելի հստակ է, քանի որ նա տարանջատում է ընտրությունները ներքին կյանքի կարգավորման համար և Արցախի կարգավիճակը։ Եվ երբ իրենք նշում են, որ իրոք կարևոր է, սա իրականությունն ավելի մոտ է»,-ասաց Բաբայանը։
Նա վերահաստատեց, որ Արցախում ընտրություններ չեն անցկացնում նրա համար, որ ճանաչեն, այլ որ ժողովրդավարական համակարգը գոյություն ունենա, մեր պետությունը գոյատևի։
«Ինչ խնդիրներ կային այս ընտրություններում, դա այլ խնդիր է։ Բացի դրանից, չպետք այն զուգակցվի ճանաչման հետ, և Զախարովան հայտարարեց պետության դիրքորոշումը, որ այս պահի դրությամբ չի ճանաչում Արցախի Հանրապետությունը, բայց չի նշանակում, թե Արցախը պետք է զրկված լինի ընտրություններից։ Հետևաբար, մենք, իհարկե, բոլոր այդ գնահատականներին ուշի- ուշով հետևում ենք, չենք վհատվում, նաև չենք ուզում իրականությունից կտրվել և չենք ուզում վարդագույն ակնոցներով տեսնել իրականությունը։ Իրականությունը այնպիսին է, ինչպիսին կա, պետք է ուժեղ պետություն ձևավորենք, և պետք է համառորեն պայքարենք մեր իրավունքների համար։ Այդքան բան»,-ասաց Բաբայանը։
Արցախում կորոնավիրուսով վարկաված հինգ հիվանդ կա, բայց այս պահին ընտրությունների երկրորդ փուլը հետաձգելու հետ կապված որևէ որոշում չկա։ Բաբայանի կարծիքով՝ ամեն ինչ պետք է որոշվի առողջապահական նորմերին համահունչ․ «Չպետք է հարցը քաղաքականացվի, անթույլատրելի և անբարոյական եմ համարում այս գործընթացի քաղաքականացումը։ Եվ որոշ մարդիկ, իրենց դրած մարդասերի տեղ, շահարկում են դա ոչ թե մտածելով մարդկանց առողջության մասին, բնավ ոչ, քանի որ Արցախում բոլորս գիտենք բոլորին, թե ով ինչ է խոսում և ինչի համար է խոսում։ Եվ հետևաբար, մինչև առողջապահության նախարարությունը վերջնական եզրակացություն չտա, ոչինչ չենք կարող ասել։ Մենք պետք է հետևենք զուտ առողջապահական նորմերին»,-ասաց Դավիթ Բաբայանը։
