Ապրիլի 7-ին Արցախի երկու քաղաքացիների Հայաստան ուղարկված փորձանմուշների թեստավորման արդյունքների համաձայն՝ Արցախում արձանագրվել է կորոնավիրուսի վարակման դեռևս մեկ դեպք: Վարակակիր քաղաքացին ապրիլի 2-ին շտապօգնության մեքենայով տեղափոխվել էր Քաշաթաղի բուժմիավորում և մեկուսացվել էր, քանի որ Արցախ էր վերադարձել Հայաստանում «վարակի օջախ» համարվող բնակավայրից:
Կորոնավիրուսի հաստատված դեպքով մեկուսացված այդ քաղաքացին մասնակցել է մարտի 31-ին Արցախում տեղի ունեցած նախագահական և խորհրդարանական ընտրությունների քվեարկությանը:
Արցախի Հանրապետությունում ձևավորված նոր կորոնավիրուսի տարածման կանխարգելման աշխատանքները համակարգող միջգերատեսչական հանձնաժողովի տեղեկատվական շտաբից հայտնում են, որ մարտի 31-ին՝ ժամը 14:00-ի դրությամբ, նախքան վերոնշյալ քաղաքացու մասնակցությունը, գյուղում ընտրական իրավունք ունեցող քաղաքացիներից 50-ն արդեն քվեարկել էին, իսկ օրվա երկրորդ կեսին քվեարկությանը մասնակցել է ընդամենը 20 քաղաքացի, այդ թվում նաև հետագայում մեկուսացված սույն քաղաքացին:
«Վերոնշյալ քաղաքացին քվեարկությանը մասնակցել է Միրիկ գյուղի ընտրատեղամասում: Այս պահին ամբողջ գյուղը գտնվում է ինքնամեկուսացման մեջ: Վարակակիր քաղաքացու հետ սերտ առնչություն ունեցած բնակիչներից մեկը նույնպես թեստավորվել է և, բարեբախտաբար, նրա արդյունքը բացասական է եղել:
Ամբողջ գյուղը գտնվում է բժիշկների խիստ վերահսկողության տակ, և որևէ բնակիչ այս պահի դրությամբ որևէ ախտանշան չունի»,- «Առաջին լրատվական»-ի հետ զրույցում տեղեկացրեց վերոնշյալ շտաբի համակարգող Տիգրան Աբրահամյանը:
Վերջինս նաև հայտնեց, որ վարակակիր քաղաքացին կին է՝ ծնված 1957 թ․-ին: Աբրահամյանի խոսքերով՝ վարակակիր կնոջ մոտ ներկա դրությամբ խրոնիկ հիվանդություններ արձանագրված չեն:
«Այդ բնակչի ընտանիքի անդամները ինքնամեկուսացման մեջ են և անհրաժեշտության դեպքում նույնպես կթեստավորվեն:
Գյուղի մնացյալ բնակիչների ինքնամեկուսացումից հետո գյուղն ապահովվել է անհրաժեշտ ախտահանիչ պարագաներով, և Արցախի կառավարությունն առաջիկայում այնտեղ օժանդակության ծրագրեր կիրականացնի»,- նշեց Տիգրան Աբրահամյանը՝ հավելելով նաև, որ վարակակիր քաղաքացու առողջական վիճակը ներկա դրությամբ գնահատվում է նորմալ, նա գտնվում է Երևանում՝ վերապրոֆիլավորված «Սուրբ Գրիգոր Լուսավորիչ» հիվանդանոցում:
Աբրահամյանի վստահեցմամբ՝ քվեարկության օրը ոչ միայն վարակակիր կինը, այլև ընտրատեղամասում գտնվող մյուս անձինք եղել են դիմակով, ձեռնոցներով և անհատական գրիչներով, ինչպես նաև օգտվել են ընտրատեղամասում տեղադրված ախտահանիչ հեղուկից:
«Առաջիկայում, եթե թեստավորման ենթակա մարդիկ լինեն, ապա այդ մասին լրացուցիչ կտեղեկացնենք»,- եզրափակեց նա:
Նշենք նաև, որ Միրիկ գյուղը Քաշաթաղի շրջկենտրոնից գտնվում է 39 կմ, իսկ մայրաքաղաք Ստեփանակերտից՝ 89 կմ հեռավորության վրա: