Երևանի ընդհանուր իրավասության դատարանի՝ Կենտրոն վարչական շրջանում գտնվող նստավայրում Արթուր Մկրտչյանի նախագահությամբ ավարտվել է Արման Դ.-ի գործի դատական քննությունը:
28-ամյա Արման Դ.-ին մեղադրանք էր առաջադրվել տուժողի առողջությանը դիտավորությամբ՝ նրա ծառայողական գործունեության հետ կապված, միջին ծանրության վնաս հասցնելու համար՝ ՀՀ քրեական օրենսգրքի 113 հոդվածի 2-րդ մասի 2-րդ կետով:
Տուժողը ապահովագրական ընկերություններից մեկի աշխատակից է:
Արման Դ.-ն բնակվում է Երևանում, տաքսու վարորդ է:
Ըստ մեղադրանքի՝ 2019 թվականի հունվարի լույս 28-ի գիշերը, ժամը 2-ի սահմաններում Արման Դ.-ն վարելով «Օպել Աստրա» մեքենա, Երևանի Բագրատունյաց պողոտայում բախվել է «Նիսան Ֆուգա» մեքենայի:
Վթարից հետո դեպքի վայր է ներկայացել ապահովագրական ընկերության աշխատակից Արմեն Կ.-ն՝ իր աշխատանքային պարտականություններն իրականացնելու:
Արման Դ.-ն վիճաբանության մեջ է մտել ապահովագրական ընկերության աշխատակցի հետ՝ իր սթափությունը ստուգելու հարցի հետ կապված:
Վիճաբանության ժամանակ Արման Դ.-ն իր մոտ եղած դանակով հարվածներ է հասցրել ապահովագրական ընկերության աշխատակցի որովայնի շրջանին ու ձախ ազդրին՝ նրա առողջությանը պատճառելով միջին ծանրության վնաս՝ որովայնի ծակած-կտրած, չթափանցող, ուղիղ մկանի վնասումով վերքի ու ձախ ազդրի ծակած-կտրած վերքի ձևով:
Արման Դ.-ն դատարանում իրեն լիովին մեղավոր է ճանաչել, զղջացել է:
Տուժողը նշել է, որ ամբաստանյալից բողոք, պահանջ չունի:
Դատարանը հաշվի է առել, որ Արման Դ.-ն բնութագրվում է դրական, նախկինում դատված չէ, նրա խնամքին է 2015 թվականին ծնված մանկահասակ երեխան, տուժողը բողոք կամ վնասի հատուցման պահանջ չի ներկայացրել:
Դատարանը հաշվի է առել նաև կատարված արարքի բնույթն ու հանրության համար վտանգավորության աստիճանը, խախտված հասարակական հարաբերությունների սոցիալական նշանակությունը, հանցանք կատարելուց հետո ամբաստանյալի դրսևորած վարքագիծը, դրանք համադրել է նրա անձը բնութագրող տվյալների հետ ու եզրահանգել է, որ Արման Դ.-ի նկատմամբ պատիժ պետք է նշանակել ազատազրկման ձևով:
Արման Դ.-ն մեղավոր է ճանաչվել ՀՀ քրեական օրենսգրքի 113 հոդվածի 2-րդ մասի 2-րդ կետով և դատապարտվել է 1 տարի ազատազրկման:
Պատժի սկիզբը կհաշվվի Արման Դ.-ին փաստացի կալանքի տակ առնելու պահից, եթե այս դատական ակտը օրինական ուժի մեջ մտնի:
Ամբաստանյալը բողոքարկել է դատական ակտը՝ խնդրելով իր նկատմամբ կիրառել պայմանական դատապարտություն և իրական ազատազրկման չենթարկել:
Գործը կքննվի վերաքննիչ քրեական դատարանում Ռ. Բարսեղյան, Տ. Սահակյան, Լ. Աբգարյան կազմով:
