Ապրիլի 5-ին պետք է կայանար Սահմանադրական փոփոխությունների հանրաքվեն։
Համավարակի պատճառով երկրում արտակարգ դրություն հայտարարելու հիմքով` հանրաքվեն հետաձգվել է և դեռ հայտնի չէ, թե այն երբ կկայանա։
Երբ նշանակվեց հանրաքվե՝ հայտարարվեց Սահմանադրական դատարանի նկատմամբ տոտալ անվստահության մասին, իսկ հիմա ՍԴ-ն դեռ անորոշ ժամանակով կշարունակի գործել այդպիսի անվստահության պայմաններում։ Ստացվում է, որ ՍԴ-ի պահապան ու պաշտպանը հենց կորոնավիրուսն է։ Փաստորեն Հայաստանն այսօր միաժամանակ ապրում է երկու զուգահեռ ճգնաժամերում՝ կորոնավիրուսի տարածմամբ պայմանավորված ճգնաժամը և սահմանադրական ճգնաժամը: Իսկ ի՞նչ է հնարավոր անել այս իրավիճակում։
Քաղաքագետ Ռուբեն Մեհրաբյանի կարծիքով՝ Սահմանադրական դատարանի ներկայիս կազմին կորոնավիրուսն օգնեց պաշտոնավարել մինչև այսօր և դեռ որոշ ժամանակ էլ կօգնի. «Բայց որքան էլ կորոնավիրուսը հզոր է, ընդունակ չէ Սահմանադրական դատարանի ներկայիս կազմին լեգիտիմություն հաղորդել։ Հետևաբար ես կարծում եմ՝ Սահմանադրական դատարանի ներկայիս կազմը պաշտոնանկ անելու խնդիրը մնում է մեր քաղաքական օրակարգում, և իշխանությունը պետք է այդ ուղղությամբ իրավիճակից բխող որոշումներ այնուամենայնիվ ընդունի՝ օգտագործելով սահմանադրությամբ չարգելված ողջ գործիքակազմը»,-«Առաջին լրատվական»-ի հետ զրույցում ասաց նա։
Ըստ Մեհրաբյանի՝ մենք գտնվում ենք տնտեսական ճգնաժամային վիճակում, որի ժամանակ պետք է ոչ ստանդարտ քայլեր իրականացվեն տնտեսական քաղաքականության մեջ, նաև՝ քաղաքական ռեֆորմներ.«Այդ քայլերին գնալը ներկայիս սահմանադրական դատարանով խիստ ռիսկային է։ Նույնիսկ այս ծանր իրավիճակում մտահոգ կոնտինգենտը ջանք ու եռանդ չի խնայում՝ շարունակելով հարվածներ հասցնել պետությանը։ Հետևաբաբար, այո՛, նրանց իրավիճակի վրա ներգործություն կատարելու հնարավորություն թողնելը խիստ վտանգավոր է։ Չեմ բացառում, որ որոշ հաշվարկների բերումով իշխանությունը անցնի հարցի լուծման առաջին տարբերակին, որից ինքը կամովին հրաժարվեց ու հարցը ներկայացրեց հանրաքվեի»։
Դիտարկմանը, թե նկատի ունի՝ խորհրդարանում հարցը լուծելու տարբերակը, Մեհրաբյանն արձագանքեց.«Այո, իսկ ինչու՞ ոչ։ Մենք ավելորդ փող չունենք, որպեսզի այսօրվա Սահմանադրական դատարանին այսպիսի գործունեության համար շարունակենք աշխատավարձ վճարել։ Թող գնան իրենց տունն իրենց հաշվին պահեն, ոչ թե հարկատուների և մանավանդ՝ ոչ թե ի վնաս հարկատուների»։
Իսկ արդյոք հետագայում հանրաքվե անելու դեպքում «այո»-ի շանսերը չեն նվազի, մեր հարցադրմանն ի պատասխան, քաղաքագետն ասաց.«Չեմ կարծում, որ նվազեն։ կորոնավիրուսը եթե նրանց կարող է օգնել որոշ ժամանակ էլ պաշտոնավարել, չի կարող նրանց լեգիտիմությունը ավելացնել ու երկրորդը՝ նրանց լավը դարձնել ժողովրդի աչքի առաջ։ Թող հույսները կորոնավիրուսի վրա չդնեն ու չփորձեն իրենց իբր ակտուալությունը մտցնել մեր աչքը»։
Հարցը խորհդրարանում լուծելու տարբերակին կողմնակից է նաև քաղաքագետ Լևոն Շիրինյանը։ Վերջինս «Առաջին լրատվական»-ին ասաց՝ իշխող ուժին ժողովուրդը տվել է մանդատ, և «Իմ քայլը» խմբակցությունը պարտավոր է հարցը շատ արագ կերպով լուծել Ազգային ժողովում.«Վիրուսը չի կարող կանգնեցնել մեր քաղաքական կյանքը»,-ընդգծեց նա։
