Թերթի հետ զրույցում անդրադառնալով «Ֆորբս» հանդեսի՝ Հայաստանը աշխարհի վատագույն տնտեսությունների ցանկում դասող աղմկահարույց հրապարակմանը՝ ՀՀ նախկին վարչապետ Հրանտ Բագրատյանը հայտարարել է՝ ««Ֆորբսը» շատ մեղմ է մոտեցել։ Ե՛վ վարչապետ Տիգրան Սարգսյանը, և՛ ֆինանսների նախարար Վաչե Գաբրիելյանը խեղաթյուրում են «Ֆորբսի» հարցազրույցը… «Ֆորբսը» չի ասում, թե Հայաստանն աշխարհում երկրորդ ամենավատն է, թեև ՀՀ-ն աշխարհում այսօր 1 շնչին ընկնող ՀՆԱ-ի ցուցանիշով 144-րդն է 193 պետությունների մեջ (երբ Տ. Սարգսյանը դարձավ վարչապետ, 114-րդն էր):
«Ֆորբսը» մշակել է ցուցանիշների համակարգ, որ տնտեսության վատացման տեմպերով մեզանից միայն Մադագասկարն է վատ: Այս հասարակ բանը վարչապետն ու ֆինանսների նախարարը կամ չեն հասկացել, կամ իրենց չհասկացողի տեղ են դնում…»,- ասել է Հ. Բագրատյանը՝ իր խոսքերն ավելի հիմնավոր դարձնելու համար հրապարակելով իր և հայաստանաբնակ մի քանի տնտեսագետների կողմից կատարված հետազոտության արդյունքները, որոնք միջազգայնորեն հայտնի 7 հիմնական ցուցանիշների հիման վրա բացահսյտում են Հայաստանի տնտեսության իրական վիճակը:
«Առաջընթացի վարկանիշը և դրա բաղկացուցիչները 2006-2011թթ.» հետազոտության մեջ ընդգրկվել են 101 երկրներ, որոնցում Հայաստանը, շատ մեղմ ասած՝ բարենպաստ պայմաններում չէ: Մեր տարածաշրջանում առաջընթացի ամենաբարձր ցուցանիշը ստացել է Վրաստանը՝ «191» միավորով գլխավորելով աղյուսակը: Հայաստանը 101 երկրների շարքում զբաղեցրել է 96րդ տեղը՝ «-120» միավորով: Այդ աղյուսակում Ադրբեջանը զբաղեցնում է 9-րդ, իսկ Թուրքիան՝ 13-րդ հորիզոնականը»:
«Եթե այստեղ մի թիվ սխալ է, վարչապետն ու ֆինանսների նախարարը թող արձագանքեն: Նաև ՀՀ նախագահին եմ կոչ անում ուշադրություն դարձնել այս աղյուսակի վրա, վիճարկել այն: Այս 4 տարում ՀՀ-ն բոլոր ցուցանիշներով վատացել և կորցրել է 120 միավոր: Կարիք չկա քննարկել, թե ովքեր են Տ. Սարգսյանը, Վ.Գաբրիելյանը և Արթուր Ջավադյանը: Խռիկ տալով պետք է հանել պաշտոններից»,- հայտարարել է Հ. Բագրատյանը:
