Ռազմավարական մշակույթի ռուսական հիմնադրամի փոխնախագահ Անդրեյ Արեշևի գնահատմամբ, ինքը բարձր է գնահատում իշխող կոալիցիայի կազմած աշխատանքային խմբի և ՀԱԿ-ի միջև ձևավորած պատվիրակության անդամների հանդիպումը։
«Բարձր եմ գնահատում Հայաստանյան քաղաքական դաշտում կատարված այս վերջին քայլերը»,- ասաց ռուսաստանցի փորձագետը։
Փորձագետն ասաց, որ ինքն այս պահին չի կարող գնահատել այդ հանդիպումը Ռուսաստանի քաղաքական շահերի տեսանկյունից, սակայն ինքը՝ որպես փորձագետ, կարծում է, որ հայաստանյան իշխող կոալիցիայի ու ընդդիմության ներկայացուցիչների հանդիպումը դրական երևույթ է Հայաստանի քաղաքական կյանքի համար, քանի որ ներկայում Հայաստանի առջև մի շարք մարտահրավերներ են ծառացած, կան չլուծված խնդիրներ՝ կապված Ղարաբաղյան խնդրի հետ։
Ըստ նրա՝ ոչ ոքի համար գաղտնիք չէ, թե ինչ վիճակում է գտնվում Հայաստանը և նման հանդիպումները կարևոր են երկրի համար։
Փորձագետը չբացառեց այն, որ տվյալ երկխոսության կայացման գործում հնարավոր է՝ իրենց ներգործությունը ունեցած լինեն նաև արտաքին ուժերը։ Նա չբացառեց այն, որ Ռուսաստանը՝ որպես ԵԱՀԿ Մինսկի խմբի համանախագահող երկիր, շահագրգռված կլինի Հայաստանում քաղաքական մթնոլորտի կայունացմամբ։
