Մեծ Բրիտանիայի իշխող վերնախավի ներկայացուցիչներին կորոնավիրուսով վարակած «զրոյական պացիենտը» կարող է լինել Brexit-ի հարցով բանակցությունների Եվրամիության պատվիրակության ղեկավար, ֆրանսիացի քաղաքական գործիչ Միշել Բարնյեն։ Նրան բացահայտել են լրագրողները, որոնք փորձել են հասկանալ, թե ումից կարող էր վարակված լինել Մեծ Բրիտանիայի վարչապետ Բորիս Ջոնսոնը, գրում է Daily Mail-ը։
Բարնյեն կասկածի տակ է հայտնվել, քանի որ մարտի 5-ին նա Բրիտանիայի պատվիրակության ղեկավար Դևիդ Ֆրոստի հետ բանակցություններ է վարել Բրյուսելում։ Հաջորդ օրը Մեծ Բրիտանիայի կառավարությունը հայտարարեց Ֆրոստի ինքնամեկուսացման մասին՝ նրա մոտ կորոնավիրուսային վարակի «թեթև ախտանշանների» հայտնաբերման կապակցությամբ։ Համարվում է, որ Ջոնսոնի շրջապատից հենց նա է եղել կորոնավիրուսով առաջին վարակված մարդը։
Ֆրոստից հետո հեռավար աշխատանքի անցան նաև բրիտանական այլ բարձրաստիճան պաշտոնյաներ, այդ թվում Հելեն Մակնամարան, որը ղեկավարում է էթիկայի հարցերով կառավարական կոմիտեն։ Շուտով հայտնի դարձավ նաև վարչապետի հիվանդության մասին։