Հասարակական-քաղաքական շրջանակներում պարբերաբար լուրեր են տարածվում, որ մարտի 31-ին Արցախի Հանրապետությունում կայանալիք Նախագահի և խորհրդարանի ընտրություններից առաջ 2008թ․ սահմանադրական կարգը տապալելու մեղադրանքով անազատության մեջ գտնվող ՀՀ երկրորդ նախագահ Ռոբերտ Քոչարյանի ավագ որդին՝ Սեդրակը, Արցախի նախագահի թեկնածու Վիտալի Բալասանյանի օգտին քվեարկելու համար գումար է բաժանում Արցախի քաղաքացիներին։
<Հելսինկյան նախաձեռնություն-92>-ի ԼՂՀ կոմիտեի համակարգող, արցախցի իրավապաշտպան Կարեն Օհանջանյանը <Առաջին լրատվական>-ի հետ զրույցում նշեց, որ Արցախում էլ կան նման խոսակցություններ, բայց ինքը չի կարող ստույգ պնդել, որ կա նման բան։
Հետաքրքրվեցինք, թե Արցախում իսկապե՞ս չկա կորոնավիրուսով վարակված անձ, չի՞ գրանցվել որևէ դեպք, մարդիկ ի՞նչ տրամադրություններով են պատրաստվում ընտրություններին, չկա՞ վախ կորոնավիրուսից, ինչի պատճառով ընտրությունները հետաձգելու կոչեր են հնչում տարբեր շրջանակների կողմից։
«Ժողովուրդը հանգիստ պատրաստվում է ընտրությունների։ Եթե թեստ են անում, ուղարկում Հայաստան, որ որոշվի՝ դրակա՞ն է, թե՞ բացասական, և եթե Հայաստանում ասում են՝ չկա, կարո՞ղ է սուտ են ասում»,- ասաց Կարեն Օհանջանյանը։
Արցախցի իրավապաշտպանը տարակուսած է «Իրազեկ քաղաքացիների միավորում» ՀԿ նախագահ Դանիել Իոաննիսյանի այն հայտարարությունից, որն ասել էր, թե կորոնավիրուսի հանդեպ հանրության վախի մթնոլորտում հնարավոր չի լինի անցկացնել լեգիտիմ ընտրություններ։
Կարեն Օհանջանյանը հիշեցնում է, որ Արցախի Հանրապետության Սահմանադրության համաձայն՝ քանի մարդ էլ մասնակցի ընտրություններին՝ անկախ թվաքանակից, դրանք համարվելու են լեգիտիմ։
«Ես խիստ դեմ եմ, որ այդպիսի անձնավորությունը լինի դիտորդ Արցախի Նախագահի և խորհրդարանի ընտրությունների ժամանակ։ Եթե ինքը ցանկանում է լինել դիտորդ, ապա ինչպե՞ս է նման հայտարարություն անում։ Ես դիմել եմ Կենտրոնական ընտրական հանձնաժողովին, որպեսզի Դանիել Իոաննիսյանին թույլ չտան դիտորդ լինել։ Եթե ինքը վախենում է կորոնավիրուսից, ինչո՞ւ է գալիս այստեղ՝ դիտորդություն անելու։ Երկրորդը՝ եթե հայտարարում են, որ հանրության մեջ վախ կա կորոնավիրուսի հանդեպ, ինչո՞ւ են Հայաստանից այդքան դիտորդներով գալիս Արցախ։ Կարո՞ղ է Արցախի հասարակական կազմակերպությունները չեն կարող մոնիտորինգ անցկացնել, կամ էլ 14 թեկնածուների ներկայացուցիչները չե՞ն հետևելու ընտրությունների ընթացքին։ Ի՞նչ կեղծիքներ պետք է լինեն, որ այդ 14 թեկնածուների ներկայացուցիչները չհետևեն ու չիմանան։ Եթե Հայաստանում այդքան տեմպերով տարածվում է կորոնավիրուսը, ապա ինչո՞ւ են ուզում դիտորդները այդտեղից գալ Արցախ։ Իսկ ընտրությունները չպետք է հետաձգվեն, որովհետև անվտանգության հետ կապված խնդիրներ կան։ Լարվածությունը Ադրբեջանի հետ պահպանվում է։ Ներքին կյանքում էլ կշարունակվի անվստահությունը, հնարավոր չէ նորմալ կառավարել ժողովրդին, որն ինչ-որ բանի է սպասում անընդհատ»,- ասաց Կարեն Օհանջանյանը։
Նա տեղեկացրեց նաև, որ իր տվյալներով՝ 80 հազար պաշտպանական դիմակ է պատրաստված, որոնք լինելու են ընտրական տեղամասերում, նաև այդքան միանգամյա օգտագործման ձեռնոցներ են տեղադրվելու, որպեսզի մարդիկ հագնեն ընտրության օրը և կատարեն իրենց ընտրությունը։
