Կառավարությունն այսօրվա նիստում հաստատեց կորոնավիրուսի տնտեսական հետևանքների չեզոքացմանն ուղղված աջակցության ծրագրերի նախագիծը: Փոխվարչապետի ձևակերպմամբ՝ սպառման դեֆորմացման պարագայում կա որոշակի լիկվիդայնության անկում համակարգում, ուստի պետք է ունենալ գործողությունների և միջոցառումների շարք, որոնցով այդ խնդիրը կչեզոքացվի:
Թեմայի շուրջ «Առաջին լրատվական»-ի հետ քննարկմանը մասնակցեցին գործարարներ՝ «Կասեցում» քաղաքացիական շարժման համակարգող Սամսոն Գրիգորյանը, «Արտ լանչ» ընկերության և «Արտ» հյուրատների հիմնադիր տնօրեն Բակուր Մելքոնյանը և «Սիս» նատուրալ ընկերության տնօրեն Արմեն Հակոբյանը:
«Մեր կողմից ներմուծումները դադարեցված են, մեր խանութները փակ են: Հանգստանում ենք, այլ ելք չկա, պետք է դիմանանք: Հույս ունենք այս ամենը կարճ կտևի»,- նշեց Սամսոն Գրիգորյանը՝ հավելելով, որ եթե այս իրավիճակը երկարաժամկետ լինի, այդ ժամանակ «տրիվոգ» կլինի:
«Աշխատակիցների 50 տոկոսի չափով պարապուրդ ունենք թե՛ սննդի կետերում (քրեակատարողական հիմնարկներին և բանակին մատակարարող հատվածները չենք փակել) թե՛ հյուրատներում,- նշեց Բակուր Մելքոնյանը: -Փորձում ենք փոխհամաձայնության գալ պարապուրդի մատնված աշխատակիցների հետ, որովհետև ընդհանրապես չվճարելը անմտություն կլինի և սխալ վերաբերմունք աշխատակցի նկատմամբ: Մենք կօգտվենք նաև կառավարության ընձեռած հնարավորությունից»:
Իսկ «Սիս» ընկերությունն աշխատում է արտակարգ ռեժիմով՝ պահպանելով սանիտարահիգիենիկ կանոնները,- նշեց Արմեն Հակոբյանը և վստահեցրեց. «Մեր աշխատակիցների ինքնազգացողությունը օրը 3-4 անգամ ստուգվում է, ջերմաչափվում, աշխատում են դիմակներով: Մեր վաճառքի աշխարհագրությունը լայն է, առյուծի բաժինը Ռուսաստանին է բաժին ընկնում, այսինքն՝ այս պահին մեր կազմակերպությունը ավելի շատ տուժում է սահմանային սահմանափակումներից, նաև ռուբլու արժեզրկումից»:
Քննարկման մասնակիցների դիտարկմամբ՝ կորոնավիրուսը լուրջ վնաս է հասցնում Հայաստանի տնտեսությանը, և կառավարության ասյօրվա որոշումները հօգուտ գործարարների են:
Մանրամասն՝ տեսանյութում: