Առայժմ վաղ է խոսել Իտալիայում COVID-19 կորոնավիրուսի բռնկման դադարի մասին, բայց նոր դեպքերի թիվը մի քանի օրում նվազել է՝ Ժնևում կայացած ճեպազրույցում ասել է Առողջապահության համաշխարհային կազմակերպության ներկայացուցիչ Մարգարետ Հարիսը:
«Հույսի նշույլ կա: Բայց դրա մասին խոսելը դեռ վաղ է, բայց հիվանդության և մահվան նոր դեպքերը վերջին օրերի ընթացքում նվազել են», – ասել է նա:
Իտալիան առաջին տեղում է Եվրոպայում կորոնավիրուսի տարածման տեմպերով, իսկ անցած շաբաթվա վերջին՝ Չինաստանից առաջ է անցել զոհերի քանակով: Պաշտոնական տվյալներով՝ ներկայում Ափենիններում արձանագրվել է նոր տեսակի վիրուսով վարակվելու ավելի քան 63 հազար դեպք, ապաքինվել է ավելի քան 7 հազար հիվանդ, զոհերի թիվը հասելէ 6077-ի: