Վերաքննիչ քրեական դատարանի վարույթում է Մովսես Ն.-ի և Կարինե Գ.-ի գործի դատական քննությունը:
Գործը քննվել է Կոտայքի մարզի ընդհանուր իրավասության դատարանում Տաթևիկ Գրիգորյանի նախագահությամբ:
42-ամյա Մովսես Ն.-ին մեղադրանք էր առաջադրվել նախնական համաձայնությամբ, զինված ավազակային հարձակմամբ հափշտակություն կատարելու համար՝ ՀՀ քրեական օրենսգրքի 175 հոդվածի 2-րդ մասի 2-րդ, 3-րդ, 4-րդ կետերով:
36-ամյա Կարինե Գ.-ին մեղադրանք էր առաջադրվել վերոհիշյալ ավազակային հարձակմանն օժանդակելու՝ հանցագործության միջոցներ, գործիք ու անհրաժեշտ տեղեկատվություն տրամադրելու համար՝ ՀՀ քրեական օրենսգրքի 38-175 հոդվածի 2-րդ մասի 2-րդ, 3-րդ, 4-րդ կետերով:
Ավազակային հարձակման կատարման վերաբերյալ ահազանգը հարձակման ենթարկված կնոջից ստացվել է 2019 թվականի մարտի 8-ին:
Տասն օր անց՝ մարտի 18-ին, կամովին ոստիկանություն է ներկայացել ու ավազակային հարձակման կատարումը խոստովանել է Մովսես Ն.-ն:
Նույն օրը բերման է ենթարկվել ու հանցագործությանն օժանդակելու համար մեղադրվել է Կարինե Գ.-ն:
Ըստ մեղադրանքի՝ Կարինե Գ.-ն նախապես ձեռք բերված պայմանավորվածության հիման վրա օժանդակել է համաքաղաքացի Մովսես Ն.-ին, վերջինիս խորհուրդներ ու տեղեկատվություն է տրամադրել, նրան տվել է նաև ավազակային հարձակման համար միջոցներ ու դանակ:
2019 թվականի մարտի 6-ին Կարինե Գ.-ն նախապես խոստացել է պարտակել Մովսես Ն.-ի կողմից կատարելիք ավազակային հարձակումը, նրան խորհուրդներ ու տեղեկատվություն է տրամադրել ապագա զոհի՝ իրենց համաքաղաքացուհու բնակության վայրի, նրա հետ համատեղ բնակվողների, նրա բնակարանում պահվող ոսկե իրերի ու գումարի գտնվելու տեղի մասին:
2019 թվականի մարտի 8-ին Կարինե Գ.-ն Մովսես Ն.-ին է տվել հանցագործության միջոց հանդիսացող, իր կողմից նախապես պատրաստված դիմակը, անգույն կպչուն ժապավեն, նաև՝ հանցագործության գործիք հանդիսացած դանակը:
Կարինեն Մովսեսի հետ գտնվել է հեռախոսակապի մեջ և նրան հաղորդագրություն է ուղարկել, որ Հասմիկ Բ.-ն բնակարանում մենակ է:
Այդ հաղորդագորությունը ստանալուց հետո Մովսես Ն.-ն մարտի 8-ին, ժամը 13-ն անց 50-ի սահմաններում դիմակավորվել է և որպես «մարտիության նվեր»՝ապօրինի մուտք է գործել Չարենցավանի շենքերից մեկի՝ իրենց կողմից որպես թիրախ ընտրված բնակարան: Որպես զենք գորևծադրված դանակով նա տանտիրուհի Հասմիկ Բ.-ի կյանքի ու առողջության համար վտանգավոր բռնություն գործադրելու սպառնալիքով ավազակային հարձակում է կատարել:
Մովսես Ն.-ն, ըստ դատական ակտի, կպչուն ժապավենով կապկպել է բնակարանատեր Հասմիկ Բ.-ի ոտքերն ու ձեռքերը, պահանջել է ոսկե զարդեր ու գումար:
Ապա դիմակավորված Մովսեսը տանտիրուհուն քարշ է տվել ննջասենյակ, Կարինեի նախնական ուղղորդմամբ՝ այնտեղ գտնվող զգեստապահարանից հափշտակել է ոսկե ու արծաթյա արժեքավոր զարդեր և դիմել է փախուստի՝ Հասմիկ Բ.-ին պատճառելով խոշոր չափի՝ 659 հազար դրամի գույքային վնաս:
Դատարանում ամբաստանյալներն իրենց լիովին մեղավոր են ճանաչել, զղջացել են:
Տուժող կինը նշելէ, թե չի հաշտվել ամբաստանյալների հետ, խնդրել է նրանց նկատմամբ նշանակել խիստ պատիժ:
Դատարանը հաշվի է առել կատարված հանցավոր արարքի հանրային վտանգավորության բարձր աստիճանը, ինչպես նաև այն, որ երկու ամբաստանյալներից յուրաքանչյուրի խնամքին են մինչև 14 տարեկան անչափահաս երեխաներ. Մովսես Ն.-ի խնամքին են 13, 12 և 10 տարեկան, Կարինե Գ.-ի խնամքին՝ 13 և 10 տարեկան երեխաներ:
Մովսես Ն.-ն մեղավոր է ճանաչվել ՀՀ քրեական օրենսգրքի 175 հոդվածի 2-րդ մասի 2-րդ, 3-րդ, 4-րդ կետերով և դատապարտվել է 6 տարի իրական ազատազրկման:
Կարինե Գ.-ն մեղավոր է ճանաչվել ՀՀ քրեական օրենսգրքի 38-175 հոդվածի 2-րդ մասի 2-րդ, 3-րդ, 4-րդ կետերով և դատապարտվել է 6 տարի իրական ազատազրկման:
Պատիժների սկիզբը կհաշվվի ամբաստանյալներին փաստացի արգելանքի տակ առնելու պահից, քանի որ ներկայումս նրանց խափանման միջոցը ստորագրությունն է չհեռանալու մասին:
Գործով հայտնաբերված, առգրավված և իրեղեն ապացույց ճանաչված ոսկե և արծաթե զարդերը կվերադարձվեն տուժող կնոջը:
Բերված վերաքննիչ բողոքով խնդրվում է Կարինե Գ.-ի պատժի մասով փոփոխել դատավճիռը, նրան իրական ազատազրկման չդատապարտել, կիրառել ՀՀ քրեական օրենսգրքի 64 և 70 հոդվածները, նշանակել մեղսագրված արարքի համար օրենքով նախատեսված նվազագույն պատժից ավելի մեղմ պատիժ, կիրառել պայմանական դատապարտություն և Կարինե Գ.-ի նկատմամբ սահմանել փորձաշրջան:
