Հայաստանում իրապես աննախադեպ իրավիճակ է ստեղծվել․ փակ են երկրի բոլոր սահմանները, չեն գործում կրթական, մշակութային հաստատությունները, առևտրի խոշոր կենտրոնները, մեկը մյուսի հետևից հետաձգվում են զանգվածային միջոցառումները։
Կորոնավիրուսի հետևանքով ինքնամեկուսացել է «Հայաէրոնավիգացիա» ՓԲ ընկերության անձնակազմը, որը պատասխանատու է Հայաստանի Հանրապետության տարածքում և Հայաստանի երկու միջազգային օդանավակայաններում անվտանգ օդային երթևեկության կազմակերպման համար: Կորոնավիրուսով վարակման վտանգի պատճառով աշխատակիցները ինքնամեկուսացվել են ընկերության վարչական շենքում: Որոշումը կայացվել է համատեղ՝ Առողջապահության նախարարության, Քաղաքացիական ավիացիայի կոմիտեի և «Հայաէրոնավիգացիա» ՓԲԸ-ի ղեկավարության կողմից։ Հարկադիր նախազգուշական միջոցներ են ձեռնարկվել Էջմիածնում ընկերության աշխատակցի կորոնավիրուսով վարակման փաստի բացահայտման կապակցությամբ: Մարտի 14-ին կորոնավիրուսի հաստատված դեպքերից մեկը գրանցված է դպրոցահասակ երեխայի մոտ։ Երեխան հոսպիտալացված է, իսկ դպրոցում նրա շփման շրջանակը՝ դասընկերներն ու ուսուցիչները, մեկուսացվում են։
Մի խոսքով՝ երկրում փաստացի արտակարգ իրավիճակ է ու բացակայում է միայն այն ֆորմալ ամրագրելու որոշումը, որն այլևս օրախնդիր է ու թերևս դրան սպասում է հասարակությունն՝ իրեն ավելի պաշտպանված, անվատանգ զգալու համար։
Երեկ տեղի ունեցած մի քանի իրադարձություններ հուշում են, որ երկրի քաղաքական իշխանությունը կարծես ունի երկրում արտակարգ դրություն հաստատելու որոշում և նախապատրաստում է այն։
ԱԺ նախագահ Արարատ Միրզոյանը երեկ երեկոյան իր ֆեյսբուքյան էջում քաղաքացիներին կոչ է արել դադարեցնել բազմամարդ հավաքների մասնակցելը: «Հանուն ձեր և ձեր սիրելիների առողջության, պարզապես դադարեցրեք կազմակերպել բազմամարդ հավաքներ, հրավիրել և մասնակցել այդպիսի միջոցառումների, այցելել բազմամարդ վայրեր։ Կորոնավիրուսի վարակը կատակ չէ, դրա տարածումը զսպելուն ուղղված միջոցները և առաջարկվող կանոնները կատակ չեն»,- գրել է խորհրդարանի նախագահը՝ թերևս ակնկարկելով, որ երկրում մոտ օրերս հայտարարվելու է արտակարգ դրություն՝ չեղարկելով կամ հետաձգելով նաև ապրիլի 5-ի հանրաքվեն։
Դրա մասին է վկայում նաև Հայաստանի Կենտրոնական ընտրական հանձնաժողովի՝ երեկ ուշ երեկոյան տարածած հայտարարությունը, որը տեղեկացնում է, որ ՀՀ Սահմանադրության փոփոխությունների 2020 թվականի ապրիլի 5-ի հանրաքվեի տեղամասային ընտրական հանձնաժողովների անդամների և տեխնիկական սարքավորումներն սպասարկող մասնագետների նախապես հայտարարված դասընթացների օրերը անորոշ ժամկետով տեղափոխվում են։ Դասընթացները պետք է մեկնարկեին մարտի 15-ից:
Այսպսիսով՝ երկրում փաստացի հայտարարվել է արտակարգ դրություն, որը պետք է ստանա իրավական փաթեթավորում՝ կառավարության նախաձեռնությամբ ու խորհրդարանի որոշմամբ։ Բոլորը սպասում են Նիկոլ Փաշինյանի քայլին։
Խելամիտ կլինի կառավարության անցումը 24-ժամյա աշխատանքային ռեժիմի՝ ստեղծելով իրավիճակը վերահսկող և իրավիճակից բխող անհրաժեշտ գործողությունների մասին որոշումներ կայացնելու պատրաստ օպերաատիվ շտաբ։ Դա հնարավոր կլինի իրականացնել արտակարգ դրության ռեժիմի պայմաններում։
Լուսանկարը՝ Armeniasputnik-ի