Ղազախստանի նախագահ Նուրսուլթան Նազարբաևը Համբուրգի հիվանդանոցներից մեկում շագանակագեղձի վիրահատություն է տարել: Այս մասին հաղորդում է Reuters գործակալությունը՝ հղում անելով գերմանական Bild պարբերականին: «Վիրահատությունից հետո Ղազախստանի նախագահն իրեն լավ է զգում: Այժմ նա վերականգնվում է քաղաքի կենտրոնական հիվանդանոցներից մեկում»,- գրել է թերթը:
Երեկ օրվա ընթացքում մամուլում հայտնվել էին տեղեկություններ այս վիրահատության մասին, սակայն այն հիվանդանոցում, որտեղ ենթադրաբար գտնվում էր Նազարբաևը, անվտանգության խիստ միջոցառումներ էին, և չէր հաջողվել պարզել՝ արդյոք այս տեղեկությունը համապատասխանո՞ւմ է իրականությանը:
Ղազախստանի կառավարությունը երեկ տեղեկացրել էր, որ Նազարբաևը արձակուրդում է, սակայն նրա գտնվելու վայրի մասին տեղեկություններ չէին հաղորդվել:
