Իսրայելի իշխանությունները որոշում են ընդունել արտասահմանից ժամանողների համար պարտադիր կարանտին սահմանել՝ նոր տիպի կորոնավիրուսի տարածման դեմ պայքարի շրջանակներում։ Այս մասին հաղորդել է երկրի վարչապետ Բենյամին Նեթանյահուն՝ Twitter-ի իր էջում։
Արտասահմանից Իսրայելի տարածք մուտք գործող յուրաքանչյուր մարդ պետք է երկշաբաթյա կարանտինի մեջ գտնվի, նշել է Նեթանյահուն։ Նա ընդգծել է, որ տվյալ որոշումը «դժվար» է եղել, սակայն այն անհրաժեշտ է հասարակական առողջության պահպանման համար։
Արտասահմանցիները կկարողանան մուտք գործել Իսրայել միայն այն դեպքում, եթե ապացուցեն, որ տեղ ունեն, որտեղ կարող են խիստ մեկուսացման մեջ երկու շաբաթ անցկացնել։ Որոշումը ուժի մեջ կմտնի 72 ժամից։
