Վրացական GHN լրատվական գործակալության փոխանցմամբ՝ Հարավային Օսիայի նախագահ Էդուարդ Կոկոյտան հայտարարել է, որ 2004 և 2008 թվականներին ռազմական պարտություն կրած վրացական ներկայիս իշխանությունները մտադիր են ռևանշի հասնել.
«Թբիլիսիում հասկացել են, որ ռազմական տեսանկյունից արդեն ոչինչ չի կարելի փոխել, ինչի համար էլ նրանք մշակում են տարբեր պլաններ՝ Հարավային Օսիային Վրաստանի քաղաքական ուղեծրում ներառելու համար։
Սակայն մենք չենք կարող Վրաստանի հետ կազմել որևէ համադաշնություն ու դաշնություն։ Եթե մենք դրան վերադառնանք, ապա մեր ապագա սերունդը կմատնվի նոր տանջանքների ու փորձությունների։ Այդ դեպքում այն ժամանակ հանուն ինչի՞ էինք մենք պայքարում և ռիսկի տակ դնում այդքան մարդու կյանք»։
Հիշեցնենք, որ ներկայումս Հարավային Օսիան մտադիր է դիմել միջազգային դատարան՝ ընդդեմ ԵԱՀԿ առաքելության ցխինվալյան գրասենյակի։ Վերջինս մեղադրվում է 2008 թվականի օգոստոսյան պատերազմից հետո անգործության ու Վրաստանի կողմից հարձակմանն աջակցելու մեջ.
«Մենք ունենք փաստեր, վկայություններ, որ 2008 թվականի օգոստոսյան պատերազմի ժամանակ Ցխինվալում ԵԱՀԿ առաքելության ներկայացուցիչներն անգամ ապաստան փնտրող երեխաներին չեն թույլատրել մտնել իրենց շենքի բունկերը։ Մենք սկսել ենք նյութեր հավաքել այս կապակցությամբ, որպեսզի ԵԱՀԿ-ի դեմ դիմենք միջազգային դատարան։ Այդ կազմակերպությունն իր լռությամբ նաև աջակցել է Հարավային Օսիայի վրա Վրաստանի գործած հարձակմանը»։
