ՀՀԿ խմբակցության ղեկավար Գալուստ Սահակյանը, անդրադառնալով երեկ իշխող կոալիցիայի կազմած աշխատանքային խմբի և ՀԱԿ-ի միջև ձևավորած պատվիրակության անդամների՝ մոտ երկու ժամ տևած հանդիպմանը, «Առաջին լրատվականի» հետ զրույցում ասաց, որ շատ դրական է գնահատում երկխոսության գնալու կողմերի ձգտումը։
«Դրական եմ գնահատում նույնիսկ այն, որ դա իրողություն դարձավ, սկիզբ դրվեց հետևյալին՝ կան խնդիրներ, որոնք հնարավոր է լուծել անգամ բաց քննարկման միջոցով»,- ասաց Գ. Սահակյանը՝ նշելով, որ անգամ երկրորդ հանդիպում չլինելու դեպքում առաջին հանդիպումն ինքնին առաջընթաց է։
Նրա խոսքով, մեկ խնդիր կա, այն է՝ երկիրը, քաղաքական դաշտը կայուն լինի, նպաստավոր հող ստեղծվի առաջացած հարցերը քննարկելու համար, ժողովրդի կենսամակարդակը բարձրանա։
«Կարևորը պետության հիմքերն ամրացնելն է»,- ասաց Գ. Սահակյանը։