Հայաստանի և Արցախի Հանրապետությունների մարդու իրավունքների պաշտպաններ (ՄԻՊ) Արման Թաթոյանն ու Արտակ Բեգլարյանը փետրվարի 21-22-ին համատեղ այցեր են ունեցել Արցախում տեղակայված որոշ զորամասեր, Ստեփանակերտի կենտրոնական զինվորական հոսպիտալ, ինչպես նաև ռազմական ոստիկանություն ու Շուշիի քրեակատարողական հիմնարկ։ Այցերի ընթացքում տեղի են ունեցել առանձնազրույցներ զինծառայողների և սպայական կազմերի հետ, ուսումնասիրվել են նրանց իրավունքների հարցերը, բուժծառայությունների վիճակը, կարգապահական տույժերի և քրեական գործերով ձերբակալումների ու կալանքների հիմքերը, զինծառայողների պահման պայմանները և այլն։
«Առաջին լրատվական»-ի հետ զրույցում ՀՀ ՄԻՊ Արման Թաթոյանը տեղեկացրեց, որ այցը պայմանավորված էր վերջին շաբաթների ընթացքում արձանագրված զինծառայողների մահվան դեպքերի հետ։
«Բացի դրանից՝ մեր գործունեության մոնիտորինգն ու Արցախի ՄԻՊ-ի հետ մեր խորհրդակցությունները ցույց էին տալիս, որ համատեղ ինտենսիվ աշխատանքների կարիք կա․ Արցախում մարդու իրավունքների պաշտպանությունն իմ մշտական ուշադրության ներքո է, սակայն ուզում եմ ընդգծել, որ այստեղ մի կարևոր առանձնահատկություն կա՝ թե´ իմ գործընկեր Արտակ Բեգլարյանը, թե´ ես մեր արձանագրած խնդիրներին անդրադառնալու ենք յուրաքանչյուրս մեր իրավասությունների շրջանակում և հընթացս միմյանց աջակցություն ենք ցուցաբերելու այդ խնդիրների վերջնական լուծման ճանապարհին, բայց մեր լիազորություններից դուրս որևէ այլ բան անել չենք կարող»,- նշեց Թաթոյանը։
Մանրամասները՝ տեսանյութում։