Բրազիլիայում վեց ամսական երեխան վարդակին միացված հեռախոսի լիցքավորիչը բերանը տարավ ու մահից մազապուրծ եղավ: Այս մասին հայտնում է Daily Mail-ը:
Դեպքը տեղի է ունեցել երեքշաբթի՝ փետրվարի 18-ին, Մատո Գրոսո նահանգի Լուկաս դո Ռիո Վերդի համայնքում: Երեխան արթնացել է, և մինչ մեծերը կնկատեին, սկսել է խաղալ ներքնակի մոտ դրված բջջային հեռախոսին միացված լիցքավորման լարով: Ինչ-որ պահի աղջիկը այն տարել է բերանը: Հոսանքահարումից երեխան կորցրել է գիտակցությունը, իսկ տան էլեկտրական ապահովիչները անջատվել են։
Հարազատները այրվածքներ ու վերքեր ստացած անգիտակից երեխային հասցրել են մոտակա բուժկենտրոնի վերակենդանացման բաժանմունք։ Բժիշկները վախենում էին, որ նա կարող է շնչահեղձ լինել էլեկտրական հարվածից թոքերում հավաքված թքի պատճառով: Հեղուկը հանվել է հատուկ ապարատով:
Երբ կյանքին վտանգ այլևս չէր սպառնում, երեխային տեղափոխեցին հիվանդանոց՝ հետագա բուժումը ստանալու և ապաքինվելու համար։
Բժիշկ Հելենո Շտրոբել Ռոզան, որը տուժածին առաջին օգնություն է ցուցաբերել, հաղորդել է, որ երեխային բերել են «ծանր վիճակում՝ սրտի շատ թույլ բաբախով շնչառության ցածր հաճախականությամբ»: Նա ծնողներին հորդորել է զգոն լինել նման դեպքերից խուսափելու համար: